Efrîno ke binê îşxalê dewleta tirke de yo, tede pêkewtişê mabênê Heyet Tehrîr El Şamî û cerganê bînan dewam kenê.

Wexto ke merdim bala xo dano parçebîyayîşê cergan ser vîneno ke komê Cebhe El Şam û Ceyş El Îslam, Tumena Hamza (Hamzat) û koma Sûltan Suleyman Şahî (Emşat) yê OSOyî qezaya El Babî ya Helebî de 10ê teşrîna verêne de şer kerdo. Şer derbazê Efrînî bi. Destpêk de qezayanê Şêrawa û Cindirês de qewimîya dima zî ver bi merkezê Efrînî vila bi.

Mîyanê cerganê Cebhe El Şam û Ceyş El Îslamî de komê bi nameyê Tumenan El Mecd, Tûgaya El Îslam, Tumena Melîk Şah û Tumena 51î est ê. Mîyanê cerganê Tumena Hamza (Hamzat) û Sûltan Suleyman Şah (Emşat) de zî komê bi nameyê Tûgaya Nûreddîn Zenkî, Tumena El Şam, Tûgaya Farûk, Tumena 1ine, Ceyş El Şarqiye û Ahrar El Şarqiye est ê ke zafê înan tirkmen ê.

Xeber û agahîyî vanê ke pêkewtişê mabênê Heyet Tahrîr El Şam û Cebhe El Şamî têmîyan û bêmana yê. Agahîyê verênî vanê ke Heyet Tahrîr El Şamî noqtayê stratejîkî yê Efrînî vistê destî û wazeno waranê bînan de îdareyê xo awan bikero. Nê cergî vilawekan danê şarî û tede vanê ke 'ê bi çekan nêerzenê keyeyê şarî ser, dest nênê malê şarî ser.' Bi nê hawayî nê cergî xîret kenê ke raştîya Efrînî binimnê û dinya  bixapînê. 

Heyet Tahrîr El Şam keno ke Efrîn de serwerîya xo îlan bikero. Eşkera yo ke çarçewa 'têkilîyanê neweyan' ê Şam-Anqara de yeno waştene ke Îdareyo Xoser tasfîye bibo û hukmatê Şamî reyna Sûrîye de serwer bibo. Coka ganî no prosesê serê hemkarîya Tirkîya û Rûsya bikero ke rejîmê Şamî newe ra Sûrîye îdare bikero.

Xîretê 'asayîkerdişê' têkilîyanê mabênê Tirkîya û Sûrîye tay cergî aciz kerdbî. Xora nê cerganê ke hetê Tirkîya ra perwerde bîyê û weye bîyê, îlan kerdbî ke vera rejîmî înan xo rêxistin kerdo. Nika prosesêko wina dest pêkeno ke ya nê cergî do bêrê tasfîyekerdene yan zî xetêke ser de bêrê helnayene. Reşwa nikayêne mojnena ke cergî do bêrê komkerdene, tayê înan bêrê tasfîykerdene û ê bînî zî plananê neweyan de do cabigêrê. Coka dewleta tirke wazena cergan xetêka sîyasîye de arê bida û bişuxilna. No operasyon zî sey operasyonêkê dewleta tirke ganî bêro ercnayene û raştîya dewleta tirke ya faşîsta ke hetê stratejîke ra nêvurîyena bida famkerdene.

Senî ke Rûsya pê bêvengîya xo îşxalê Efrînî tesdîq kerdo, pêkewtişanê mabênê cergan peygoş kena û hêrişê neweyî yê dewleta tirke yê vera Rojawanî tesdîq kena. Nêzdîbîyayîşê Amerîka zî sey ê Rûsya yo. Eşkera yo ê do reyna paştî bidê îşxalê dewleta tirke û cergî reyna do binê kontolê Tirkîya de bibê.