Serra 2012î de Zîndanê Mislimîye yê Helebî de binê ablûqaya El Nûsra û SMOyî de wehşetêko pîl amebi kerdene. Şahîdanê ê wehşetî ra Mûhammed Hesen Mûstafa û Şêxmûs Berazî ANFyî rê qala ê rojan kerde. 

Sweda û Mislimîye di zîndanê namdarî yê Sûrîye yê ke pê zulmê xo şinasîyenê. 2012 de cerganê El Nûsra dormeyê zîndanê Mislimîye girewtbi. Na ablûqa de tepişteyî nêweşî, vêşanîye û hêrişan ra merdî.

Muhammed Heseno ke Efrînî ra yo wina qala ê rojan kerde: ''Ez 2005 de tepişîya. Adara 2012î de cergan dormeyê zîndanî girewt. O çax erzaq zî nêmend. Verî helîkopteran nanî ser ra eştêne zîndanî la nan çewî ra qîm nêkerdêne. 13ê temmuze de tay tepişteyan vera vêşanîye sere wedarna, berî şikitî, hêrişê polîsan kerd. Înan çekê polîsanê rejîmî girewtbî la wextêkî ra dima fîşekê înan zî qedîyayê. Ma zanayêne ke ma destê polîsanê rejîmî ra bixelisê zî teber de cergî estê, coka ma sere nêwedarna. Ê tepişteyanê çekdaran zî dima çekê xo dayî, teslîm bîyî. Dima leşkerî eştî koxûşan ser û tepişteyê ke sere wedarnabi kiştî. Bi îşkenceyî zî di kesî kiştî. Leşkeran fîşekî eştî derûdor. Yew gule gina lingê mi zî. OSO û El Nûsrayî zî tim hêrişê zîndanî kerdêne. Nêweşîye, vêşanîye û hêrişan ra xeylêk kesî merdî. Nêweşîye û vêşanîye ra nêzdîyê hezar kesî merdî. Nêzdîyê 350 kesî zî bi hêrişanê sekbanî û hawanan merdî. Çar mengan de ma çîyêk nêwerdbi. Ez 85 kîloyan ra kewta 35 kîloyan.

16ê temmuze de verî Heyva Sor a Sûrîye ameya û erzaq ard. La no erzaq qetî ma rê nêvejîya. 700 tepişteyî vera dîyayî. Nêzdîyê 1300 tepişteyî û 200-300 leşkerî kişîyayî. Dewlete naye nimnena. Sibata 2014î de zî ma ameyî berdene bi zîndanêkê bînî. Dima efû vejîya. Ez 2015 de zîndanî ra vejîyaya.''

Şêxmus Berazîyo ke Efrînî ra yo û babîyê şehîdî yo, zî wina vat: ''2008 de ez kewta Zîndanê Mislimîye. O prosesê ablûqa zaf zehmet bi, nan çinbi ke ma biwerê. Ez sibata 2013î de zîndanî ra vejîyaya. Heta ê çaxî 612 kesî zîndan de merdbî. Mi bi çimanê xo dî ke El Nûsra pê topan 34 kesî kiştî.  Erzaqê ke ma rê ameybî erşawitene, pê pereyan leşkeran rotêne ma. Îmkanê xoşitişî çinbi. Zîndan de nêweşîye, janê weremî vila bîyî. Ez hema zî nêeşkena bi rehetî rayîr a şora.''