Azîz Mihemed Ehmed (61) Qamişloyî ra yo û babîyê 7 domanan o. Lajê ey Dogan Azîz Ehmed 22yê tebaxa 2016î de Minbic de şehîd bi. Azîz Mihemed lajê xo reyde heman çeperî de vera DAÎŞî şer kerdbi. Birayê Azîz Mihemedî Îsa Mihemed Ehmed (Xebat) 1994 de mîyanê refanê PKKyî de şehîd bi.

Azîz Mihemed Ehmedî wexto ke Şam de karkerîye kerdêne 1986 de PKK şinasnayo û 1995 de Rayberê Şarê Kurdî Abdullah Ocalan dîyo. Azîz Mihemed Ehmedî ANFyî rê qala pêvînayîşê xo yê bi Abdullah Ocalanî kerde.

Azîz Mihemed Ehmedî vat ke 1983 de ey bi rayîrê Rahman Korkmazî (Selîm) PKK şinasnayo û vat: ''1984 de seba Hemleya 15ê Tebaxe ma broşurî vila kerdêne. 1988 de seba ke şarî berê warê Rayberîye ma wesayîtêk amade kerd la rejîmê Şamî hêriş kerd. Netîceya hêrişê rejîmî de merdimêk şehîd bi û teda zêdîyaye. Mi PKKyî ra ver xeylêk partîyê kurdan şinasnabî la sey PKKyî înan tesîrê mi nêkerd. Çunke PKKyî qala kurdan û Kurdîstanî kerdêne. 

15ê tebaxa 1995î de seba ke Rayberîye bivînê ma şîyî Şamî. Rayber Apoyî uca de qasê panc saetan ma de qisey kerd. Wexto ke ma agêrayî hînî seke ez kesêko bîn bîya. Mi zana ke Rayber Apo rayberêko pîl o. Rayber Apoyî û PKKyî se vatêne o qayde kerdêne. Qisey û pratîkê înan yew bîyî. 

Wextê komployî de Rayber Apo 1998 de Sûrîye ra ame vetene. O çax nê çîyî ma zaf dejnayî. Dima Rayber Apo teslîmê dewleta tirke ame kerdene. Ma zanayêne ke Rayber Apo zîndan de bibo zî PKK do têkoşînî rê dewam bikero. Xora wina zî bi. Dişmenî no hesab nêkerd. PKKyî bi îdeolojî û felsefeyêke dest pêkerd û bi pîlêr. PKK do bin nêkewo.

Rayber Apo seba Şorişê Rojawanî erjêko fîraz o. Rayberîye, şehîd, şerwan, şar û erdê nê şorişî fîraz ê. Rayber Apo rayberêko qîmetîn û tarîxî yo. Analîzê ey ewro zî siba zî derbazdar ê. Rayber Apo û PKKyî ra nêbîyêne ewro kurdî zî nêbîyêne. Keda Rayber Apoyî nêna vîrakerdene.''