Wextê peyênî de hêrişê DAÎŞî yê vera Rojawanî zêdîyayî. Vervatoxê Îdareyê Xoserî Loqman Ehmeyî derheqê hêrişanê dewleta tirke û serebûtanê Zîndanê Sanaa de ANFyî rê qisey kerd.

Ehmeyî ard ziwan ke ronayîşê Îdareyê Xoserî ra nata dewleta tirke hêrişê ci kena. Ehmeyî vat: ''Ezaz û Cerablus verî destê DAÎŞî de bîyî la dewleta tirke DAÎŞ mesele nêkerdêne. Key ma dest pê hemle kerd dewleta tirke hêrişê ma kerd. Prosesê Mûsilî ra nata mabênê dewleta tirke û DAÎŞî de têkilîye esta. Wextê îşxalê Girê Sipî û Serêkanîyê de zî bi mabênçîtîya Rûsya û amerrîka peymane amebî îmzakerdene la rixmê ney zî hêrişê dewleta tirke bi hawayêkê sîstematîkî dewam kenê. Hêrişê DAÎŞî yê vera zîndanê Hesekê de zî giştê dewleta tirke esto. Herême de mutefîqê DAÎŞî estê. Îdareyê Şamî zî paştî dano hêrişanê DAÎŞî. Îdareyo Xoser tim hedefê hêrişanê dewleta tirke û rejîmê Sûrîye de yo. Peyê înan de zî Rûsya esta.''

Ehmeyî bale ante hêrişê DAÎŞî yê zîndanê Hesekê ser û vat: ''Nê zîndanî de xeylêk endamê DAÎŞî estê. Ma verî zî venga hêzanê mîyanneteweyîyan da ke nê endamê DAÎŞî yê ke hemwelatîyê înan ê wa bêrê muhakemekerdene. Hema zî cewab nêdîya nê vengdayîşê ma. Kampa Holê de zî bi hezaran keyeyê DAÎŞî estê. Îdareyê Xoserî tim waşt ke welatê ke keyeyê DAÎŞî yê Kampa Holê hemwelatîyê înan ê wa bigêrê. La qet yew welatî xo nêzdîyê ney nêkerd. Hetê bînî ra hêrişê dewleta tirke zî asayîşê herême qels kenê. Cergê DAÎŞî zî ney ra îstîfade kenê. Serebûto peyên ê Hesekê eşkera keno ke DAÎŞ pê hucreyanê xo yê nimiteyan eşkeno xeylêk serebûtan bivejo, xo rêxistin bikero û dinya rê bibo gefêko cidî. Hêrişê DAÎŞî têna vera Îdareyê Xoserî nê vera pêro welatan gefêk o.

DAÎŞ wextêkê dergî na herême de serdest bi, tîya de hişmendîya ci esta hema. Xizanîya komelkîye û ambargoyî zî zemîn danê rêxistinbîyayîşê hişmendîya DAÎŞî. Seba ke herême de hişmendîya DAÎŞî bêra şiknayene, seba ke meseleyê ekonomî bêrê qedînayene ma xebitîyenê. Ganî seba ke gefê DAÎŞî binî ra biqedo pêro hêzê mîyanneteweyî û msuldarî bi hawayêkê cidî bixebitê.''