Qamişlo, Til Temir, Til Koçer, Şêrawa û Şam de hêrişê îşxalî yê dewleta tirke yê vera Herêmanê Pawitişî yê Medya ameyî protestokerdene.

Qamişlo

Komîteya Cinîyan a Meclîsê Qamişloyî bi eşkerayîyêke hêrişê îşxalî protesto kerdî. Zozane Îbrahîme eşkerayîye wende û vat: ''Hêzanê mîyanneteweyîyan destûr da nê hêrişan. Ganî hêzê sîyasî yê kurdan û şarê kurdî nê hêrişan red bikerê.''

Til Temir

Çalakîya Til Temirî de Hemşaredarê Til Temirî Ebdulbaqî Kotîyî eşkerayîye wende û vat: ''Dewleta tirke destkewteyanê kurdan hedef kena la hukmatê Bexdad û Hewlêrî vera hêrişan bêveng ê.Ganî pêro kurdî paştî bidê gerîlayan.''

Til Koçer

Rayberîya Meclîsê Til Koçerî de hêrişî pê çalakîya rayraşîyayîşî ameyî protestokerdene. Şarî çalakîye de sloganî vatî û dima zî nawnayîşêk kerd. Endama Kongreya Starî Hala Mihemed qisey kerd û da zanayene ke Tirkîya nêeşkena îradeyê kurdan bişikna.

Şam

Paytextê Sûrîye Şam de bi desan kesan hêrişê îşxalî yê dewleta tirke protesto kerdî.Eşkerayîye de ame vatene ke dewleta tirke wazena kurdan çin bikera û xeyalanê Osmanîyan bîyara ca.

Şêrawa

Qezaya Şêrawa ya Efrînî de rayberîya Kongreya Starî de pê çalakîya rayraşîyayîşî hêrişî ameyî şermezarkerdene. Çalakîye de posterê Rayberê Şarê Kurdî Abdullah Ocalanî û pankartî ameyî kiriştene. Endama Kongreya Starî Gılê Mihemed dima nawnayîş de qisey kerd û îfade kerd ke dewleta tirke semedo ke krîzanê zereyî ra bixelisa nê hêrişan kena la do bin bikewa.