Partîyê Yewîya Neteweyî ya Kurdan (PYNK)  û ENKSyî Rojawan de semedê yewîye babeta ronayîşê 'Mercîya Berz a Kurde' de pê kerd.

Pêvînayîşê mabênê PYNK û ENKSyî 7 aşmîyo dewam kerdêne. Kombîyayîşo peyên 2ê êlule de ame kerdene. Goreyê xebera ANHA endama Heyetê Muzakereyî ya PYNKyî Sema Bekdaş vat ê pêvînayîşanê verênan de Pêkerdişê Duhokî esas girewt û înan pêvînayîşanê peyênan de derheqê 'Mercîya Ber a Kurde' de munaqeşe kerd û badê 10 kombîyayîşan na babete pê kerd. Bekdaşe ard ziwan ke name sey 'Mercîya Berz a Kurde' ame bedilnayene û wird hetan şeş madeyan ser pê kerd.

Goreyê zanayîşanê ke Bekdaşe dayî Mercîya Berze ya Kurde 40 kesan ra do bêro raameyene. Wird hetan ra do 16 kesî tede ca bigerê û 8 kesê xoserê bînî zî hetê endamanê PYNK û ENKSyî ra bêrê vîjnayene. Bekdaşe ard ziwan ke îdîaya sey partîyê bînî teberê xebatanê yewîye de yenê tepiştene raşt nîyê û vat aksê naye de ma wazenê ke heme hetî tewr bibê û berê ma pêrune rê akerde yo.