Hûmara merdimanê ke pê vîrusî kewtî pêro dinya de zêdîyena û resaye nêzdîyê 700 hezar kesî.Tewr tay 30 hezar kesî zî Korona ra merdî. Rojawan de zî seba têkoşînê vera vîrusê Korona Komîteya Weşîye ameye awankerdene. Endamê Komîte Doktor Ebdulezîzî Mîoyî derheqê Korona de ANFyî reyde qisey kerd. Mîoyî derheqê rewşe herême de vat: ''Ma tebdîrî girewtî, merkezê weşîye yê taybetî ameyî awankerdene. Testî yenê kerdene. Heta nika nêweşîye nêameye tesbîtkerdene.''

Dr. Ebdulezîz Mîoyî vist vîrî ke vîrus pê kixe û fişkerdişî vila beno û vat: ''Baldar bibê ke heta 3 metreyan nêzdîye çewî mebê. Vîrus bi destdayîş zî vila beno. Pêro merdimî eşkenê pê nê vîrusî bikewê. 

Dr. Ebdulezîz Mîoyî eşkera kerd ke seba vergirewtişê vilabîyayîşê vîrusî ganî aktîvîteyê komî bêrê vindertene û seba xopawitişê vîrusî nê pêşnîyazî kerdî:

Destî ganî bêrê şitene

Maske û lapikî bêrê xebitnayene

Dezenfektanê antî-bakterîyelî bêrê xebitnayene

Keye û cayê karî ganî tim pakî bibê û hewayo pak bikewo zere

Pakîya şexsîye bêra kerdene

Seba xurtkerdişê sîstemê pawitişê leşî ganî vîtamînî bêrê girewtene. Pîyaz û sîr ganî tewrê erdî bêrê kerdene. Çay, lîmon, sebze û meyweyî bêrê werdene.

Bi hawayêkê nîzamî spor bêro kerdene

Cixare bêro veradayene

Heta nika nêweşîyêke nêameye tesbîtkerdene

Dr. Ebdulezîz Mîoyî ard ziwan ke heta nika Rojawan de qet nêweşîyêka Korona nêameye tesbîtkerdene û vat: ''Rojêke de tewr tay 10 testî yenê kerdene Kesê ke tira guman yeno kerdene  bi hawayêkê cîyayî yenê weşkerdene û 48 saetan de binê çimdarîye de yenê vindertene. Dima ke testê hewcedarî yenê kerdene teşhîs yeno kerdene. Heta bika herême de nêweşîya Korona nêamey tesbîtkerdene.''

Dr. Ebdulezîz Mîoyî eşkera kerd ke kesê ke pê vîrusî kewtî seba ke vîrus vila nêbo ganî xo komelî ra dûrî bigêrê. Dr. Ebdulezîz Mîoyî vat: ''Ganî her kes wayîrê keye û merdimanê xo bivejîyê. Eke ma tebdîranê xo bigêrê û pê berpirsîyarîye têbigêrê hînî ma do bieşkê ke nê prosesî ra bixelisê. ''

Dr. Ebdulezîz Mîoyî tewr peynî de vat ke ganî her kes goreyê qedexeyê vejîyayîşê teberî têbigêro.