Şaristananê Girê Sipî, Qamişlo û Til Hemîsî yê Rojawanî de şar vera îşxalî werişt payan ser.

Girê Sipî

Şarê Girê Sipî dewa Salîhîyê de vera dewleta tirke û cerganê ci werişt payan ser. Îşxalkeran waşt ke dibistana dewe xo rê sey merkez bixebitnê û rastê nêrazîbîyayîşê şarî ameyî. Şarî nêverda ke îşxalkerî destê xo nayê bînaya dibistanî.

Qamişlo

Kongreya Starî hêrişê dewleta tirke yê vera Başûrê Kurdîstanî Qamişlo de bi rayraşîyayîşêkî şermezar kerd. Rayraşîyayîş de temsîlkarê rêxistinanê sivîlan û rîsipîyê herême amde bîyî. Şarî posterê Rayberê Şarê Kurdî Abdullah Ocalanî akerd. Rayraşîyayîşî ra dima nawnayîşêk ame kerdene. Îdarekara Kongreya Starî Remzîya Mihemed nawnayîş de qisey kerd û hêrişê vera Heftanînî şermezar kerdî. Remzîya vat ê do xoverdayîşê xp dewam bikerê.

Til Hemîs

Til Hemîs de şarî vera îşxalê dewleta tirke rayraşîyayîşêk kerd. Çalakîkeran alayê QSD, Kongreya Starî û pankarta bi nuşteyê ''Ma erdê xo û azadîya xo ra fek vera nêdê'' akerdî. Rayraşîyayîş dima vurîya nawnayîş. Nawnayîş de temsîlkarê El-Amûdî û hemserekê Meclîsê Til Hemîsî Ekaz Ehmed Şetîyî qisey kerd û seba yewîya neteweyîye veng da. Endama Kongreya Starî Neyîre El-Hemko zî îfade kerd ke ganî vera plananê dewleta tirke her kes baldar bibê.