Dewleta tirke vizêr hêrişê Kobanê kerdbî. Hêriş de 2 kesî şehîd bîyî û 7 kesî zî birîndar bîyî. Roniştoxanê Kobanê, herêma Cizîre û Dêra Zorê pê çalakîyanê cîya-cîyayan hêrişê dewleta tirke yê vera Kobanê şermezar kerd.

Kobanê de cinîyan rayberîya Kongreya Starî de eşkerayîyêke daye. Eşkerayîye de ame vatene ke dewleta tirke ya îşxalkere do nêeşka îradeyê şarê kurdî bişikna û ê do vera hêrişan xoverdayîşê xo pîl bikerê.

Qamişlo, Hesekê, Dêra Zorê, Amûdê, Tirbesipîyê, Dêrik, Til Berak, Girkê Legê û Dirbêsîyê de zî roniştoxanê Rojawanî bi çalakîyanê cîya-cîyan û eşkerayîyan rayberîya cinî û ciwanan de hêriş protesto kerd. Çalakîyan de sloganê sey 'Kiştox Erdogan' ameyî vatene. Qiseykerdişan de seba pîlkerdişê têkoşînî veng ame dayene û bêvengîya warê mîyanneteweyî ya vera hêrişan ameye şermezarkerdene. Çalakîkeran ard ziwan ke ê do tim paştî bidê şerwananê QSDyî û xoverdayîşê xo rê dewam bikerê.