Rojawanijî bi wesîleya serrgêra 44. ya ronayîşê PKKyî ANFyî rê qala ci kerde ke înan senî PKK şinasnayo, senî tewrê têkoşînî bîyê.

Şêx Ehmed Hemoyê kobanêyîjo ke bi nameyê Şêx Mişmişî şinasîyeno serra 1975î de koçê Reqa keno û uca de Têkoşînê Azadîye yê Kurdan şinasneno.

Şêx Mişmişî wina qala ê rojan kerde: ''Reqa de komêka embazan estbî. 1979 de ez kewta binê tesîrê deyîran ê neteweyîyan ê Şivan Perwer, Gulîstane û Aram Tîgranî. O çax têgêrayîşê kurdan estbîyî la zaf xurt nêbîyî. Ma eşnawit ke Vakur de partîyêka kurdan ronîyaya.

Mabênê serranê 1979-80î de Reqa de 30 ciwanî pê hîsê neteweyî kom bîyî. O çax ma de hişmendîya neteweyîye çinbî. Têna ma waştêne Rojawan azad bo. Xîret ame kerdene ke komêka ciwanan derbazê Başûrî bibo. Mi 1984 de Reqa de dest pê karî kerd. 1985 de verî Reqa de Hemleya 15ê Tebaxe ameye fîrazkerdene. Bi nê hawayî têkilîya ma ya bi têkoşînê azadîye yê kurdan dest pêkerde. 1986 de Reqa de reya verêne Newroze ameye fîrazkerdene. Serranê 1986-89î de mi karê rêxistinîya komelkîye ardî ca.

17ê gulana 1995î de komêka Rojawanî kom bîye ke ez zî tede bîya. Na kome Rayber Apo dî. Serê ey de kincê normalî estbîyî. Ma pê nêhesîyayî ke o Rayber Apo yo.

Newroza Reqa ra dima 1987 de rejîm ez destbend kerda. Komployê 1999î ra dima ez reyna tepişîyaya. 2003 de zî rojawanijan her ca de çalakîyêke kerdêne. Reqa de ma rayraşîyayîşêko pîl kerd. 2005, 2009, 2010 de ez zaf reyî tepişîyaya. La ma qetî têkoşînî ra dûrî nêvindertî. Ma hêzê xo Rayberîye û şehîdan ra girewtêne. Ma pê bawerîyêka pîle zerrî û canî ra xebitîyayêne.''