Rojawanijî bi wesîleya serrgêra 44. ya ronayîşê PKKyî ANFyî rê qala ci kerde ke înan senî PKK şinasnayo, senî tewrê têkoşînî bîyê.

Babî Şehîd Dilşêrî le Kobanê de sey Ehmedê Pîrê şinasîyeno serra 1979î de wexto ke berberîye kerdêne Apogîran şinasneno. Pîrêyî wina qala ê rojan kerde: ''Embaz Cemal (Murat Karayilan) çend reyî ame taxa ma, şarê Kobanê keyeyêk da înan. O semedo ke gijikê xo bido qesnayene rojêke ame mi hetî. Bi nê hawayî mabênê ma de têkilîye bîye. Serra 1980î de sempatîya mi xurtêr bîye û ez tewrê xebatan bîya.  Mi hetkarîye arê dayêne, vilawekî vila kerdêne, şarî rê wendêne. O çax her kesî hetkarîya înan kerde. Dadîyan, merdiman tay kesan hakî dayêne înan, tay kesan nan dayêne ci.

Heta serranê 1986-1987î mi nê karî kerdî. Dima ez bîya kurye. Ma embazî derbazê şaristananê Vakurî kerdêne. Serra 1993î de koma ke ez zî tede bîya embaz Mustafa Karasu, Riza Altun û Jîyane (waya M. Hayrî Durmuşî) pêşwazî kerdî. Rayberîye ma rê vatbi 'Şima şehîd zî bikewê nê embazan weş û war biresnê. Nê embazê ma yê verênî yê, embazê ma yê zîndanî yê. Wextê derbazbîyayîşî de şerêko qij qewimîya. Têna embaz Riza bi sivikî birîndar bi. Dima Rayberîye ameye, moral da ma. Ey derheqê qeçaxçîyan de ma hîşyar kerdî.

Serra 1986î de ma waşt Rayberîye bivînê. Ma sey komêke şîye Heleb û ma Rayberîye dîye. O mîyanê şarî de bi û qala prosesê sîyasî, rewşa kurdan ûsn. kerdêne. Rayberîye qasê 6 saetan ma rê qala rewşa kurdan û şorişê PKKyî kerde. Mi Heleb, Lubnan û Şam de zaf reyî Rayberîye dîye.

Şam de aktîvîteyêke estbî. Koma Aram Tîgran amebî. Ez zî mîyanê komîteya amadekarîye de bîya. Ma semedê Rayberîye kursî ardî la o şi mîyanê şarî de ronişt. Ey şarî ra zaf hes kerdêne. Ey Aram Tîgranî ra zî zaf hes kerdêne. Seba ey vatbi 'No veng nêmireno.'

Wexto ke Rayberîye Sûrîye ra vejîyaye Ewropa 3 embazî ameyî ke mîyanê înan de 2 cinîyî estbîy. Ganî ma nê embazî biberdêne teberê sînorî. La ma nêeşkayî. Sînor amebi qefilnayene. Her yew metre de 9 leşkerî estbîyî.

Seba ke Rayberîye Sûrîye ra bêra vetene operasyonêk dîyabi destpêkerdene. Esadî ci rê vatbi wa mevejîyo. La Rayberîye seba ke rîyê ci ra vera Sûrîye hêriş nêro kerdene tira vejîyaye. O çax dewleta tirke waşt serê sînorî de krîz biveja. Cerablus de hêrişê qereqolan kerd. La Sûrîye cewan nêda ci û krîz nêqewimîya. Heta ke Rayberîye Sûrîye ra vejîyaye ma serê sînorî de xebitîyayî. Dima karê ma vindertî. Ma dest pê karanê bînan kerd. Nika ma nê karanê xo rê dewam kenê.

PKK 4 serrî yo têkoşîn keno û vera beno pîlêr. Her şehadetî de ma nêzdîyê şorişî benê.''