Dewleta tirke ya îşxalkere 9ê teşrîna verêne ya 2019î de vera Serêkanîyê û Girê Sipî hêrişî îşxalî dayî destpêkerdene. Rojnamegere Rûkene Cemala ke hêrişanê vera Rojawanî yê 9ê teşrîna verêne ya 2019î teqîb kerdî, bale ante ser ke medyaya tirkan prosesê îşxalî de senî têgêraye.

Rûkene Cemal da zanayene ke medyaya tirke medyaya tirke hêrişê îşxalî sey operasyonê pawitişê sînoran mojnayî û raştîyî vurnayî. Rûkene Cemal vat: ''O çax rojnamegerê ke teberî ra ameyî ya destend bîyî yan zî herême ra ameyî dûrîkerdene. Têna medyaya hawuzî ya dewleta tirke rê destûr dîya. Înan zî tim propaganda kerdêne û vatêne Tirkîya bi nê operasyonê bi nameyê 'Pinar Bariş Harekati' sînoranê xo pawena.

Serêkanîyê de zaf tay rojnamegerî estbîyî çunke bombardumanê giranî qewimîyayêne. Di embazanê ma yê rojnamegeran Serêkanîyê de şehîd bîuî. Ma bi mesuldarîya rojnamegerîye Serêkanîyê de têgêrayî. Ma waşt ke qîrayîşê şarê herême bidê eşnawitene. Ez, embaz Gulane û embaz Ersînî wina xebitîyayî ke raştîyan vejê werte. Ma maruzê zaf hêrişan bîyî, ge ge mergî ra agêrayî.

Dewleta tirke pê medyaya xo şero taybet kerd. Medyaya ci wina mojna ke seke Serêkanîyê de bi Tirkîya her çi bi holêr û aramî. Ma zanenê ke Serêkanîyê de se bîyo, Efrîn de se bîyo. Ewro Girê Sipî de pereyê tirkan şuxilîyeno. Tirkîya pê medya xîret kena ke rîyê xo yê kolonyalîstî binimna.

Ma Serêkanîyê de bi îmkananê kêman xebitîyayêne. Ceyran û înternet çinbîyî. Destê ma de tay dîmenê estê ke hema nêameyî weşanayene. La ma reyna zî nêvindertî. Îşxalê Serêkanîyê ra di serrî vîyartî. Şarê Serêkanîyê têna wazeno ke erdê xo ser de bi aramî û haştîye biciwîyê. Ma sey rojnamegeranê ê çaxî dejanê înan zanenê. Ma qetî xo vîr a nêkenê ke konvoyê ma yê sivîlan amebi pirodayene.''