Dewleta tirke 15ê sibate de hêrişê dormeyê kampa romananê Efrînî ya Şehba zî kerdbi ke nê romanî xo sey koçeran pênase kenê.

Romanê ke roniştoxê taxa Koçera ya Efrînî yê înan mîyanê Şorişê Rojawanî de ca girewt û 2017 de zî hemserekê xo vetî werte. Wexto ke dewleta tirke ya îşxalkere 20ê çeleyê 2018î de hêrişê Efrînî kerd romanî 58 rojan şaristanî ra nêvejîyayî. Romanî nika 4 serrî yo kampa Şehba de manenê. Kampa Koçera de 700 kesî manenê. Înan ANFyî rê qala xoverdayîşê xo kerd.

Emîne Kemal Muhammeda ke lajê ci şehîdê Efrînî yo vat: ''Erdoganî 58 rojî ma ser o bombayî varnayî. Ma neçare mendî ke bêrê Şehba. Nika zî kampe ser o bombayan varnenê. Erdogan se keno wa bikero ma do Şehba ra nêvejîyê. Ma hende şehîdî dayî. Ma do rayîrê şehîdanê xo de bibê. Rojêke ma do abigêrê Efrînî. Bêguman Efrîn do azad bibo.''

Huseyîn Şêxoyî da zanayene ke xêrê hendekanê dormeyê kampe ra bomnbardumanê 15ê sibate de zerarêk nêresayo înan û vat: ''Zorbazî û tedaya dewleta tirke ra ma Efrînî ra ameyî tîya. Mi Şehba de pay na mayînî ser û birîndar bîya. Dewleta tirke tîya de zî her roje bombayan varnena ma ser. Ê wazenê ma çin bikerê la ma do çin nêbê. Heta ke weş bibê ma do xo ver bidê û rojêke qetî abigêrê Efrînî.''

Hemserekê Kampa Koçera Kamber Dedeyî vat: ''Ma bi Şorişê Rojawanî û Îdareyê Xoserî azad bîyî. Dima ke dewleta tirke Efrîn îşxal kerd ma nêwaşt Efrîn de bimanê. Ma 4 serrî yo Şehba de binê zehmetîyan de ciwîyenê. La ma do qetî Şehba ra nêşorê. Serrgêra 15ê Sibate de dewleta tirke Şehba reyna daye bombayan ver. A roje seba azadîya Rayberîye Şehba de çalakîyêke amebî kerdene. Dewleta tirke wazena bi rayîrê nê bombardumanan ma Şehba ra vejê û Efrînî ra dûrî bifînê. La ma do Efrînî ra dûrî mebê, ma wazenê wa Efrîn azad bo.''