Endama Komîteya Zîndanan a PAJKî Rozerîne Ocalan derheqê serrgêra Hemleya 'Abdullah Ocalanî rê Azadîye, Meseleya Kurdan rê Çareserîya Sîyasîye' de ANFyî rê qisey kerd.

Qiseykerdişê Rozerîne ra noqtayê girîngî wina yê:

''Hemleya Azadîye par 10ê teşrîna verêne de dîyabî destpêkerdene û ha serrêke xo pey de verdena. Hemle bi xîretê dostanê ma global bîye. Tewr peyên fîlozofanê dinya zî azadîya Rayber Apoyî sey azadîya xo pênase kerde û ney ma bi kelecan kerdê. Hetê bînî ra parçeyanê Kurdîstanî de, her warî de şarê ma bi xurtî wayîrê hemle vejîya. 

Serra diyîne ya hemle de ganî ma hemle biresnê asta netîcegirewtişî. Erkê ma yo ke ma linga komelkî û îdeolojîkî ya na hemle xurtêr bikerê. Her ca de nê esasî ser o ganî ma erk û mesuldarîya xo bîyarê ca.

Ma bi asanî vînenê ke azadîya Rayber Apoyî azadîya cinî û şaran a. Eke ma tecrîdê vera Rayber Apoyî bişiknê û azadîya ey bîyarê ca, no do bibo serkewtişê têkoşîn û caardişê azadîya cinî û şaran. Heta ke Rayber Apo azad nêbo kurdî zî do azad nêbê. Coka serra verêne ya Hemleya Azadîye zafêr dormeyê azadîya Rayber Apoyî de derbaz biba. Têkoşînê gerîlayani têkoşînê cinîyan, têkoşînê komelî, têkoşînê zîndanan, têkoşînê şar û dadîyanê ma û têkoşînê dostanê ma dormeyê hemle de vîyartî. Ganî ma kêmasîya xo fam bikerê û raşt bikerê. 

Sey xoverdayîşê Îmraliyî ganî têkoşînê azadîye zî wina bibo ke asta mîyanneteweyîye de bêro kerdene. Serra diyîne ya hemle de eke kêmasîyê serra verêne bêrê wedaritene no do tesîrê pîlî bikero û netîce bivisno destî. Xoverdayîşê Îmraliyî îsbat kerd ke eke merdim bi azadîye bawer bikero, xo ver bido do ser bikewo.

Îqtîdarê AKP-MHPyî polîtîkaya qirkerdişî Îmraliyî de ano ca. Seserra vîstîne de Kurdîstan de xeta Rayberîye ser de têkoşînê azadîye dest pêkerdbî. Estbîyayîşê Rayberê ma û têgêrayîşê ma yê azadîye hem seba kurdan hem zî seba şaran û cinîyan alternatîfêko cidî aferna. Îmrali eynikê pêro hêrişanê vera kurdan, cinîyan û komelî yo. Rayberê ma rê Îmrali de teslîmîyet yeno ferzkerdene. La xoverdayîşê Îmraliyî zî bîyo çimeyê pêro têkoşînan.

Girîng o ma hemle biresnê astêka hîna radîkale, girseyî, bitesîrî û netîcegirewtişî. Seba ney zî bingeyê şerê şarî yê şorişgêrî de ganî serewedaritişî bêrê kerdene, vera hêrişan komel bêro rêxistinkerdene. Babeta rêxistinîye de kêmasîyê ma yê cidîyî est ê. Verê cû dişmen nêeşkayêne tank û hêzanê xo debikerê taxanê ma. Ganî ma şerê taybetî hîna zaf xo rêxistin bikerê.Heta ke ma nêbê welatperwerê raştikênî nêeşkenê bibê şorişgêrê raştikênî. Welatperwerîya raştikêne bi rêxistinî û xoverdayîşî bena. 

Dişmenî polîtîkayê zîndanan vera xoverdayîş û têkoşînê ma awan kerdê. Embazê ma 27ê teşrîna peyêne ya 2023yî de bi grevê vêşanîye tewrê xoverdayîşê zîndanan bîyî. Rixmê teda û hêrişan zî embazanê ma bi çalakîya grevê vêşanîye tesîrê teberî kerd û hemle rê serkêşîye kerde.

Xoverdayîşê grevê vêşanîye 4ê nîsana 2024î de resa astêka newîye û bi şîarê 'Ma wazenê Rayberê xo de heman şertan de biciwîyê' embazanê ma bire daye ke nêvejîyê telefonan, pêvînayîşan û mehkemeyan ver.  Ancî çalakîya 'Veng bidê azadîye' ya dadîyanê ma tesîrê xurtî kerdî.

Vera nê tewirê embazanê ma dişmenî înfazê xeylêk embazê ma vêşnayî, cezayê dîsîplînî û hucreyî dayî. Rixmê nê teda û îşkenceyan zî zîndanan de hemle bi qerardarî dewam kena. Çalakîya keyeyanê tepişteyan zî bêmabên dewam kena. Coka serra derbazbîyaye de zîndanna de hêrişê dişmenî ney xoverdayîşê tepişteyan dîyarker bi.''