Dewleta tirke 9ê teşrîna verêne ya 2019î de hêrişê Girê Sipî kerd. 17ê teşrîna verêne ya 2019î de zî Amerîka reyde peymana anqara û 22ê teşrîna verêne ya 2019î de zî Rûsya reyde peymana Soçî îmza kerde. Rixmê nê peymanan zî hêrişê vera Rojawanê Kurdîstanî dewam kenê.

Nê di hewteyî hêrişê vera Eyn Îsayî zêdîyayî. Rûsya rixmo ke garantora adirbirnayîşê Soçî ya mabênê QSD û dewleta tirke de kayan kay kena.

Selahîyetdaranê Rûsya hêrişan ra verî QSDyî rê vato ke eke Eyn Îsa dewrê Şamî nêbo dewleta tirke do hêrişê ci bikera.

La selahîyetdaranê Îdareyê Xoserî Rûsya rê îfade kerd ke Eyn Îsa parçeyê Sûrîye yo, Rûsya sozê xo nêardî ca û ê sîyasetê şantajî do qebul nêkerê.

Noqtayê çimdarîye

Pêvînayîşî ra dima artêşa tirke ya îşxalkere hêrişê Eyn Îsayî kerd û şerwananê QSDyî zî çarçewa pawitişê meşrûyî de cewabê hêrişan da. Cergan bi rayîrê Rûsya cenazayê xo girewtî.

10ê kanûne de zî Rûsya, QSD û rejîmê Şamî pêkerd ke çarçewa adirbirnayîşî de 3 noqtayê çimdarîye bêrê viraştene.

Garantorê adirbirnayîşî hêrişan seyr kenê

Ronayîşê noqtayanê çimdarîye ra 2 rojan ra dima cerganê artêşa tirke ancî hêrişê dewanê Celb û Mişêrfê yê Eyn Îsayî kerd. Cergê Sultan Murad, Tumenê Hamza, Ehrar El Şerqîye û Selyman Şahî yê dewleta tirke tewrê nê hêrişan bîyî.

Garantorê adirbirnayîşî Rûsya û rejîmê Şamî nê hêrişan têna seyr kenê.

Hedef: Rayîrê M4î

Nê hêrişî hetê QSDyî ra ameyî pûçkerdene la cerganê artêşa tirke hêrişê merkezê Eyn Îsayî û rayîrê M4î kerd û nê hêrişî dewam kenê.

Heman waştiş

Nê pêkewtişan ra dima vizêr şan heyetêkê leşkeranê Rûsya şi sîloyanê Şergirako ke binê kontrolê artêşa tirke de yo, û selahîyetdaranê tirkan reyde ronişt. Goreyê tay çimeyan selahîyetdaranê artêşa tirke  pare kerd ke heta ke QSD û Îdareyo Xoser herême de bibê ê do hêrişanê xo dewam bikerê. Balkêş o ke şertê artêşa tirke û ferzkerdişê Rûsya yê vera QSDyî heman ê.

Pêvînayîşê Tirkîya-Rûsya ra dima cergan reyna hêrişê herême kerd. Pawîyeno ke selahîyetdarê Rûsya û Tirkîya ewro reyna bêrê yewca.

Kayê Rûsya

Rûsya verî zî vera Îdareyê Xoserî û QSDyî tay kayî kerdî. Rûsya wazena ke başûrê Îdlîbî (Lazkîye) cergan ra bêro pakîkerdene û rejîmê Şamî rê bêro teslîmkerdene. 5ê adara 2020î de peymana adirbirnayîşê Îdlîbî ameye îmzakerdene. Goreyê adirbirnayîşî Rûsya dewleta tirke ra wazena ke herêmê Cebel Zawiye û Seyh El Gabî yê Lazkîye Şamî rê bêrê teslîmkerdene. La dewleta tirke seba naye giran têgêrena.

Heman wextî yê hêrişanê vera Eyn Îsayî de Rûsya Cebel Zawiye û Seyh El Gab dayî bombayan ver. Rûsya wazena ke bi nê hawayî hem Eyn Îsa hem zî nê herêman teslîmê rejîmê Şamî bikera.

Dewleta tirke peyê hêvîya Amerîka de ya

Dewleta tirke zî hetêkî ra pabeya reaksîyonê cepheyê Amerîka yê Eyn Îsayî ya. Dewleta tirke armannc kena ke verî ke wextê wezîfeyê Donald Trumpî biqedo Eyn Îsa bivisna destî.

Eyn Îsa, Til Temir û Zirgan

Dewleta tirke bi îşxalê Eyn Îsayî armanc kena ke hîrêgoşeyê stratejîkî yê Kobanê-Reqa, Kobanê-Herêma Cizîre û herêmanê Minbicî-Cizîre bivisna destî. Artêşa tirke û cergê ci xeta Til Temir û Zirganî (Ebû Rasin) de zî hêzê xo yê leşkerîyî zêdînena.