Vakur û Rojakewtena Sûrîye de netîceyê operasyonanê peyênan ê Hêzanê Sûrîyeya Demkoratîke (QSD) de bi hezaran çeteyê DAÎŞ'î teslîm bîyî. Tewr peynî de operasyonê “Firtinayê Cizîrî” de rojakewtena Dêrazorî de bi hezaran DAÎŞ’î û keyeyê înan teslîmê hêzanê QSD’yî bîyî.

QSD’yî vizêrî eşkerayîyêk daye û da zanayene ke, mabênê di menganê peyênan de 5 hezar DAÎŞ’î teba keyeyan ci 29 hezar û 600 DAÎŞ'î teslîmê hêzanê QSD’yî bîyî.

Serdestîya DAÎŞ’î ya herême qedîyaye, labelê yeno meraqkerdene rewşa 40 hezar ra zêdeyî endamanê DAÎŞ’î û keyeyanê ci do çi biba. Vervatoxê QSD’yî Kino Gabrielî derheqê na babete de cewab da persanê ANF’yî û ard ziwan ke, înan na babete berda rojdemê hêzanê Koalîsyonê Mîyanneteweyî yê vera DAÎŞ’î û na babete ser o pêvînayîşî yenê kerdene.

SEBA VAKÛR Û ROJAKEWTENA SÛRÎYE PERSÊKA GIRD A

Gabrîelî ard ziwan, estbîyayîşê hûmarêka hende zêde ya çeteyan seba Vakur û Rojakewtena Sûrîye, herême ser o şîdetêko gird o û da zanayene ke, oprerasyonî dewam kenê coka hûmara înan beno ke do zêde biba. Gabrîelî vat, “Hêzanê QSD’yî û Koalîsyonê Mîyanneteweyî seba ke verê terorîstan bigîrê û înan weş pêbigîrê çi destê înan ra yeno kenê. Seba kesanê ke ameyî girewtene bêrê muhakemekerdene xebatî yenê kerdene. Estbîyayîşê hûmarêka gird a hende çeteyan seba QSD’yî û serkêşîya Vakur û Rojaketena Sûrîye persêka gird a.”

NÊBÎYAYÎŞÊ STATÛYÎ VERÊ MUHAKEMEKERDIŞÎ DE ASTENG O

Gabrîelî ard ziwan, nêbîyayîşê statûyî fermî yê Serkêşîya Vakur û Rojakewtena Sûrîye verê muhakemekerdişî nê kesan de asteng o û wina dewam kerd, “Persêka bîne zî muhakemekerdişê nê kesan o. Seba ke statûyêko fermî yê Serkêşîya Vakur û Rojaketena Sûrîye çin o, na verê muhakemekerdişî de astengîya tewr gird a. Şawitişê nê kesan û keyeyanê înan ver bi welatan ê ke înan ra ameyê û welat înan  de muhakemekerdişê înan babetêka munaqeşeyî ya.

SEBA MUHAKEMEKERDIŞÎ MA KOALÎSYONÎ REYDE PÊVÎNAYÎŞAN KENÊ

Gabrîelî da zanayene ke seba muhakemekerdişê nê kesan û awankerdişê dadgehêkê mîyanneteweyî, ê Koalîsyonê Mîyanneteweyî reyde pêvînayîşan kenê û wina dewam kerd, “Eynî wext de ma zaf welatanê ke çeteyî înan ra ameyî  reyde pêvînayîşan kenê. Dadgehê ke Sûrîye yan zî Iraqî de do bêrê awankerdene, ganî nê kesî goreyê qanûnanê mîyanneteweyî do bêrê muhakemekerdene û caza bêro birnayene.”

HÛMARA TEXMÎNAN RA WETIR A

Kino Gabrîel da zanaye ke, hûmara çeteyanê DAÎŞ’î ya ke herêma Dêrazorî de teslîm bîyî texmînan ra zî derbaz bîya û ard ziwan ke, çeteyê DAÎŞ’î kampanê biasayîşî yê tewr berzan de yenê girewtene. Gabrîel vat, “Labelê seba ke cewab hewcadarîya înan a bingeyêne rê bêro dayene, hewcadarîye bi hetkarîyêka girde esta. Na babete ser o zî ma Koalîsyonê Mîyanneteweyî û derzgehanê hetkarîyan ê mîyanneteweyîyan reyde pêvînayîşê kenê. Hemleya Menbîcî ra dima hûmara înan a kampan zêde bîye. Operasyonê ma yê peyênî reyde na hûmare zaf bîyê zêde.

ÊNDAMÊ DAÎŞ’Î YÊ KE 48 WELATAN RA AMEYê DESTÊ HÊZANÊ MA DE YÊ

Vervatoxê QSD’yî Kino Gabrîelî ard ziwan ke, heta nika 48 welatan ra çeteyê DAÎŞ’î destê înan de yê û vat, “Seba ke operasyonê ma dewam kenê, hûmarêka zelal derheqê çeteyanê xerîban ê DAÎŞ’î de verê destê ma de çin a.  Ma nika bala xo bi giranî danê serê qedênayîşê operasyonî. Heta nika 48 welatan ra çeteyê DAÎŞ’î hetê hêzanê ma ra ameyê girewtene. Zafêrîyê înan yê ke nê rojanê peyênan de ameyê girewtene Iraq û Tirkîya ra yê. Eynî wext de Rojakewtena Mîyanêne, Ewropa, Asya, Amerîka û zaf welatan ra zaf çeteyî teslîm bîyî.”