Şarê Rojawanî seba ke cenazayanê ke dafika PDKyî de şehîd bibî bigêrê 5ê teşrîna verêne ra nata çalakîyanê xo rê dewam keno.

HPGyî 3ê teşrîna verêne ya 2021î de eşkerayîya xo de pare kerdbi ke şewa 29ê tebaxa saete 02.30 de komêka 7 gerîlayan wexto ke Qendîlî ra derbazê Behdînanî bîyêne PDKyî vera înan dafike ronaya. HPGyî vatbi:

''Eşkera bi ke netîceya nê hêrişî de 5 embazê ma şehîd bîyê, embazêkê ma beno ke birîndar bîyo. Embazê ma Hakîyî raşta raşte serebût dîyo û wextêkî ra dima weş û war cayê serebûtî ra agêrayo. Embaz Hakîyî xo resnayo hêzanê ma û hêriş zaf hetan ra zelal kerdo.''

Sêmalka de çalakîya 111 rojan

Eşkerayîya HPGyî ra dima sere de Rojawan de çar parçeyanê Kurdîstanî û Ewropa de kurdî weriştî we.

Şarê Rojawanî 5ê teşrîna verêne ya 2021î de Berê Sînorî yê Sêmalka de dest pê çalakîye kerd. Çalakîye 111 rojan ra dima pê eşkerayîya 'Têkoşînê ma do pêro waran de dewam bikero' qedîyaye. Pêro waranê Rojawanî de 150 rojan ra zafêr o çalakîyî dewam kenê û xayinîya PDKyî yena protestokerdene.

PDKyî hêrişê çalakîye kerd

Roja 77. ya çalakîya Sêmalka de 15ê kanûna 2021î de, hêzanê PDKyî hêrişê çalakîkeran kerd. Hêrişê PDKyî de 2ê ci bi giranî 15 kesî birîndar bîyî. Hêrişî ra dima sînor ame qefilnayene û ambargo ronîya. Şarê Rojawanî vera ney nêrazîbîyayîşê xo mojna û vejîya waran.

Kobanê ra vengdayîş: Bi ruhê xoverdayîşî ma do ser bikewê

Rayberîya Meclîsê Keyeyanê Şehîdan ê Herêma Firatî de 20ê sibata 2022î de bi sloganê ''Bi xoverdayîşê Kobanê ma do îşxal û xayînîye bin bifînê'' Kobanê de çalakîya xeyme ameye kerdene. Çalakîye de ame vatene ke ''Şarê kurdî û fedayîyê ci, xeta xoverdayîşî girewte xo ver, PDK zî xeta îxanetî ya. PDK bi hemkarîya dişmenanê kurdan îsbat kerd ke vera yewîya kurdan dişmenîye keno.''

Herêma Cizîre de çalakîya xurte

Şarê Herêma Cizîre 28ê sibata 2022î de seba şehîdanê Xelîfanî Tirbespîyê de ame yewca. Rayraşîyayîş de bi dez hezaran kesan vat: ''Ma hemkarîya PDKyî ya bi dewleta tirke şermezar kenê. Ma venga şarê Başûrî danê ke destek bido têkoşînê azadîye. Hemkarîya PDKyî û Erdoganî teşhîr bikerê.''

Şarê Efrînî payan ser bi

Şarê Efrînî Şehba de 2ê adare de bi şîarê 'Bimiro îxanet ver bi Berê Serdemî şi û PDK şermezar kerd. Rayraşîyayîş de ame vatene: ''Xayinîya keyeyê Barzanî heta ewro dewam kena û zêdîyena. Şehîdanê ma heta peynî vera xayinîye xo ver da.''

Maya Haştîye: Ma vizêr Sêmalka de payan ser bîyî, nika her ca de

Maya Haştîye Suade Mistefa 5ê teşrîna verêne ra nata tewra çalakîyanê seba şehîdanê Xelîfanî bena. Suade Mistefa vat: ''Dişmen wazeno welatê ma îşxal bikera, domanê ma vera ney şer kenê. La tay kesê ke qaşo birayê ma yê, dafike nanê ro. 8 mengî yo cenazayanê ma nêdanê ma. Ma çalakîya xo ya Sêmalka qedînaye la çalakîyê ma yê bînî dewam kenê. Çend rojî verî ma Tirbesipîyê de bîyî, vizêr ma Efrîn de bîyî. Ma çalakîyan de venga her kesî danê ke wa tewirê xo dîyar bikero.

Têna cenazayê şehîdanê Xelîfanî nê, serranê 90an ra nata cenazayê domananê ma destê înan de yê, çalakîya ma nêqedîyaye. Ma do tim payan ser de bibê. Ma do cenazayanê xo peynîya peyêne bigêrê. Eke hewce bo ma do seba ney şehîd bibê. Ma serê rêçê domananê xo de yê. Xoverdayîş cû ya, bimiro îxanet.''