Rojawan de qedexeyê vejîyayîşê teberî rîyê vîrusê Korona ra 23ê adare ra nata dewam keno. Goreyê çimdarîyanê Îdareyê Xoserî se ra 80 şar goreyê bira qedexeyî têgêreno û keyeyê xo de vindeno. Herême de tebdîrê vera vîrusî zêdîyayî.

Hemsereka Meclîsê Kantonê Hesekê Semare Ebdullah derheqê tebdîrê vera vîrusê Korona de qisey kerd û qala kerdişê dewleta tirke kerde ke şarê Hesekê û qezayanê ci bêawe verdaye.Semare benga şarê herêmanê Kantonê Hesekê (Şedad, Hol, Hesekê, Til Temir, Amûdê, Dirbesîyê) da ke goreyê biranê Îdareyê Xoserî têbigêro. Semare Ebdullah bale ante qedexeyê vejîyayîşê teberî û vat: ''Îdareyê Xoserî seba weşîya şarî na bire daye û ganî her kes goreyê ci têbigêro.Wa şar cayêk de kom nêbo. Ganî heta ke neçare nêmano nêvejîyo teber. ''

Semare Ebdullah îfade kerd ke çarçewa tebdîranê vera vîrusê Korona de her ca yeno pakîkerdene û dezenfektekerdene. Semare vat: ''Ma malzemeyê pakîye û antî-bakterîyelî vila kenê. Pêro bînayî ameyî dezenfektekerdene. Kuçe û taxî ameyî şitene û dezenfektekerdene.''

Dewleta tirke  awa îstasyonê Elûkî birnaye. Semare Ebdullah derheqê babete de qisey kerd û vat: ''Dewleta tirke bi mîlyonan merdimî bêawe verdayî. Semedê birnayîşê awe ra meseleyê pîlî vejîyenî werte. Korona dinya de vila bena. Eke herême de awe nêba tehluke do peyda bibo. Hewceyê herême pê awe esto. Dewleta tirke hewcedarîya bingeyîye sey çeke xebitnena. Şar naye ra zaf ecîz o. Dewleta tirke sûcê merdimîye kena. Ma do hesabê naye bipersê. Birnayîşê awe verê nêweşîya do abikero. Ma venga Neteweyanê Yewbîyayeyan, dezgehanê mîyanneteweyîyan, rayaumûmîye danê ke tedaya dewleta tirke bikerê.'