Şerwana YPJyî Dilovane Kobanê wextê Xoverdayîşê Kobanê de Reqa de bîye û dima aye koçê Vakurî kerd. Dilovane Kobanêya ke şahîdîya a rojan kerde wina qala şerwananê birîndaran kerde:

''O çax şer giran bi. Semedo ke tedawîya şerwanan zehmet bîyî ê derbazê Vakurî ameyêne kerdene. Ez zî o çax Vakur de bîya û wextê tedawî û dermankerdişî de hetê şerwanan de bîya. Şerwanê birîndarî ameyêne ardene bi Nêweşxaneyê Riha, hayîya îqtîdarê Erdoganî pê ney estbîye. La tehluke o bi ke dewleta tirke paştî dayêne cergan. Cergî û şerwanî ge ge heman cayan de tedawî bîyêne. Şerwanan senî ke çimê xo akerdêne waştêne şorê Kobanê. Înan vatêne 'Ganî ma abigêrê cepheyê xo. Ma soz da ke Kobanê bixelisnê.' Nê tewirê şerwanan zaf tesîrê mi kerd, mi waşt ez îdeolojîya Rayber Apoyî bişinasna. O çax mi bire daye ke ez tewra şerwanan biba.

Doktorê ke birîndar û gazîyê YPJ-YPGyî tedawî kerdêne pê çêrîya înan mat mendêne. Tay doktoran vatêne 'Gelo nê merdimî melayîket ê, hende birîndarîye ra dima senî eşkenê biciwîyê.' Çunke fekê şerwanan ra qala Rayber Apoyî, Kobanê û şarî kêm nêbîyêne. O çax Erdoganî vatêne 'Kobanê ha bin kewena.' La şerwananê azadîye sozê xo ard ca û Kobanê azad kerde.

O çax mi pê çimanê xo dî ke cergan Nêweşxaneyê Riha de merdimê sivîlî xapînayêne û erşawitêne Kobanê. La nê merdimî dima poşman bîyêne û agêrayêne. Înan vatêne 'Nê (şerwanî) terorîst nîyê, merdimê azadîwaştox ê. Serekê înan esîr o, welatê înan bindest o coka şer kenê. Ma çira vera înan şer kenê.' Ewro zî ê kesê ke Erdoganî paştî dayêne ci Girê Sipî, Efrîn û Serêkanîyê îşxal kenê, qirkerdişan kenê.''