Hêzanê Asayîşî yê Hêzanê Sûrîyeya Demokratîke (QSD) kesê bi nameyê Evdilrezzaq Newaf El Qatayî tepişt. Qatay wexto ke tepişîya serê ey de vilawekêke estbî ke tede rayberê eşîran û rîspîyî ameyêne hedefkerdene. El Qatayî îtîraf kerd ke hucreyê sûîkastî hetê rejîmê Sûrîye ra ame akerdene. Vilaweke de dîyeno zanayene ke seba ke vera rayberanê êşîran û rîsipîyan sûîkastî bêrê kerdene rêxistinêka bi nameyê 'Xoverdayîşê Ereban ê Çekdaran' ronîyaye. 

El Qatayî îtîraf kerd ke na rêxistin seba sûîkastan hetê rejîmî ra ronîyaye. Wextanê peyênan de Dêra Zorê de di kesî netîceya sûîkastî de kişîyabî. El Qatayî derheqê sûîkastan de vat: ''Ma sey tîmê Hesekê hema gamêke nêeştbî la ê Dêra Zorê hedefê xo ardî ca.''

Îtîrafê El Qatayî wina yê: ''Ma seba ke rayber, roşnvîr, rîsipanê ke nêzdîyê QSDyî yê hedef bikerê Hesekê de ameyî pêser. Birê ameye dayene ke ez vilawekan vila bikera. Mi nê vilawekî bi hawayêkê nimitkeyî terefgîranê QSDyî rê vila kerdî. Ma nê kesan rê gefî wendêne. Ma nameyê Hukmatê Sûrîye nêgirewtêne xo fekî. Ma xo rê vatêne 'Xoverdayîşê Ereban ê Çekdaran.' La rejîmî rêxistine awan kerde. Nimitkîye seba ma zaf girîng a. Coka ma yewbînî nêşinasnayêne.''

Vilaweka rêxistine de pê QSDyî heqaret yeno kerdene û terefgîrê QSDyî yenê hedefkerdene. Reqa, Dêra Zorê, Minbic, Tebqa de ke tede erebî ciwîyenê wextêkê dergî ra nata bi hemkarîya MÎT-DAÎŞ û SMOyî hêrişê bomba, mayîn û sûîkastî yenê kerdene. QSDyî verê cû zî tay hêrişkeran tepiştbî û îtîrafê înan rayaumûmîye reyde pare kerdbi.