Qezaya Amûdê ya şaristanê Qamişloyî ya Rojawanî de hîrê girê tarîxîyî estê; Girê Mozan, Girê Şagirbazarî û Girê Şermolayî. Sûka Fatora zî serra 1932î de Amûdê de ronîyaye. Sûka Fatora de bi taybetî dikanê qûmaşî estê. Coka sey 'Sûka Cawî' zî yena pênasekerdene. 

Her roje Amûdê û şaristananê bînan ra hemwelatîyî yenê sûke û dikananê sol, kinc, zîynet û qûmaşî zîyaret kenê.

Hec Behcet Dawûd zî bi serran o ke sûke de dikanê xo yê qûmaşî îdare keno. Behcet Dawûdî derheqê tarîxê sûke de nê çîyî vatî: ''Amûdê verê cû dewe bibî. Dima hemwelatîyan tîya de dikanê xo akerdî. Qeza de di Sûka Fatora estbî. A yewîne seba ke rijîyabî hetê şaredarîye ra qefilîyaye. Tîya hema zî cayo tewr rind ê Amûdê yo. Hukmatê Sûrîye nameyê Fatora kerd erebkî û vat 'Wehde.' La hema zî tîya sey 'Sûka Fatora' zanîyena. Nê qûmaşî her ca ra bî taybetî Halebî ra yenê. Verê cû tîya de esnafê sûryan, armenî, kurd û erebî estbî. La xirîstîyanan dima koç kerd.''

Serra 1937î de rayberîya Seîd Axa Deqorîyî de tay eşîranê kurdan vera mandaya Fransa sere wedarit. Dima Fransa sûke ser o bombayî varnayî. Bombarduman de bi desan dikanî wel bîyî. 

Esnafan seba ke zimistan de awa varanî nêgêro pêro pîya betonî ra serbanêk viraşt. 

Enes Mela Ebdurehmanî zî 25 serran ra nata Sûka Fotora de esnaf o. Ebdurrehmanîyî vat: ''Tîya de esnafê kurd, ereb û sûryanî sey way û birayan ê. Coka na sûke heta ewroyê ma ameya. Ma tîya de sey keyeyêkî ciwîyenê.''