Dewleta tirke seba ke vera Armenîstanî şer bikerê Îdlîbî ra cerganê Partîya Îslamî ya Tirkîstanî ya El Kaîde erşawena Azerbaycanî. Partîya Îslamî ya Tirkîstanî hetê DYA, Rûsya, Çîn, Kazakîstan, Kirgizistan û Sûrîye ra sey 'rêxistina terorî' amebî îlankerdene. Tirkîya zî na rêxistine serra 2017î de sey rêxistina terorî qebul kerdbi.

Heta nika cerganê Tugayê Muntasir Bîllahî ra 75 kesî serê Dîlokî ra û Îdlîbî ra zî 200 cergî bi paştdayîşê MÎTî seba şerê Armenîstan û Azerbeycanî erşawîyabî.

Nêzdîyê sînorê Îdlîb û Tirkîya de herêma Derkoşî esta. Na herême ra zî cergê Heyet Tahrîr Şamî û Partîya Îslamî ya Tirkîstanî hetê Tirkîya ra erşawîyenê şerî.

Sefîrê Armenîstanî yê Moskova vatbi ke Tirkîya 28ê êlule de Tirkîya  vakurê Sûrîye ra 4 hezar cergî erşawitî Azerbaycanî.

Goreyê Keyeyê Çimdarî yê Heqanê Merdiman ê Sûrîye Tirkîya 30ê êlule de 850 cergî erşawitî Azerbaycanî.

Vervatoxa Wezaretê Karanê Teberî yê Rûsya da zanayene ke Vakurê Sûrîye ra cergî erşawîyenê şerê seba Kartabagê Corî.

Wezîrê Karanê Teberî yê Rûsya Lavrovî rojnameyê Sputnikî reyde pare kerd ke wexto ke ey Wezîrê Karanê Teberî yê Tirkîya reyde qisey kerd ci rê vat: ''Nêno qebulkerdene ke komê çekdarî yê îlagelaî bierşawîyayî Karabagê Corî.''

Serekkomarê Fransa Emmanuel MAcronî zî kombîyayîşê lîderan ê Yewîya Ewropa ra verî derheqê babete de vat: ''Goreyê zanayîşanê ke destê ma de yê, cîhadîstê Sûrîye Dîlokî ra erşawîyenê Karabagê Corî.  No çi do bibo sebebê alozîyan ê pîlan. Ma do naye ser o Konseya Ewropa de qisey bikerê.''