Hetkarê Hemserekanê Îdareyê Xoserî yê Rojawanî Bedran Çîya Kurdî derheqê sûcanê dewleta tirke yê vera Rojawan û Sûrîye de ANFyî rê qisey kerd.

Bedran Çîya Kurdî vist vîrî de destpêkê krîzê Sûrîye de Tirkîya waşt pê çeteyanê îslamgîran mudaxeleyê Sûrîye bikera û vat: ''Tirkîya Sûrîye de nê çeteyî her cayê dinya ra ardî û ca kerdî. Tirkîya cergê DAÎŞ, El Nûsra û El Qaîdeyî rêxistin kerdî û nêverda ke kurdî Sûrîye de serdest bibê.''

Bedran Çîya Kurdî bale ante dizdî û talananê dewleta tirke û vat: ''Tirkîya zî o çax sey nika mîyanê krîzê ekonomîkî de bîye. Tirkîya waşt pê îmkanan û çimeyanê Sûrîye xo payan ser o vindarna. Tirkîya Sûrîye de karê xo pê çerganê sey Cebhet El Nûsra, DAÎŞ û Partîya Îslamî ya Turkîstanî kerdî. Nê cergan nameyê Tirkîya ser o dizdî û talanî kerdî. Krîzê Sûrîye ra dima Tirkîya çim verda Helebî. Tewr tay 1000 fabrîkayê pîlî zî Helebî dizîyayî û a

meyî berdene bi Tirkîya. Cerganê dewleta tirke Heleb de 100 mîlyar dolar zerar vet. Rejîmê Tirkîya Heleb xo rê sey merkezê munafîsî dî. Tirkîya xo resna kamcayê Helebî talan kerd, cayê bînî zî xera kerdî.

Tirkîya Îdlîb de pêro xetê trenî kerdî xurde û berdî. Talan û dizdîya çime û malanê Sûrîye ra 10 mîlyar dolar kewt zereyê xezîneyê Tirkîya. Dima ke Heleb de çîyo qîmetîn nêmend cerganê Tirkîya merdimê zengînî remnayî û fîdye waşt.

Îşxalê Efrînî ra nata zî no talan û dizdîye qetî nêvindertî. Her kes zaneno ke Tirkîya Efrîn de sûcê merdimîye, talan kena, demografî vurnena. Bi se hezaran zeytûnêrê Efrînî ameyî birnayene, Tirkîya dest na zeytûnêranê Efrînî ser. Tirkîya nê zeytûnan roşena Ewropa û serrêke 80 mîlyon dolar nînan ra qezenç kena. Efrîn, Serêkanîyê, Girê Sipî û Îdlîb de cerganê dewleta tirke berhemê tarîxî û kulturelî diznayî, nê berhemî bazaranê Dîlokî de yenê rotene. Na dizdîye binê çimdarîya lajê Erdoganî de yena kerdene. ''

Çîya Kurdî derheqê dizdîya petrolî de zî wina qisey kerd: ''DAÎŞ û El Nûsra petrolê Sûrîye diznenê benê Tirkîya. Xora Erdoganî 2019 de kombîyayîşêkê mîyanneteweyî de vatbi ke ê ganî Sûrîye de herêmanê biasayîşan awan bikerê û tede 3 mîlyon sûrîyeyîjan ca bikerê. Erdoganî uca de vatbi ke ê do petrolê Sûrîye bivisnê destî û şarê Sûrîye rê xerc bikerê. No îlanê dizdîya petrolî bi. Tirkîya multecîyanê Sûrîye vera Ewropa sey çeke xebitnena. 

Armanc û planê îqtîdarê Tirkîya eşkera yê. Armancê înan îşxal o û talanê tarîxî yo. Tirkîya binê vateyê 'hetkarîya sûrîyeyîjan' de Sûrîye talan kena. Erdogan û keyeyê ci serkêşîya nê talanî kenê. Heleb de Erdoganî rê 'dizdê Helebî' vajîyeno.''

Çîya Kurdî îfade kerd ke Tirkîya cergan reyde pê kamyonan çekî berdî Sûrîye û çekê qedexekerdeyî û kîmyewîyî dayî nê cergan. Çîya Kurdî vat: ''Nê çekî Heleb û Efrîn de şuxilîyayî. Xeylêk rojnamegeran, selahîyedaran eşkera kerd ke Tirkîya çekê kîmyewîyî xebitnayî. Dîmenê peyênî yê SADATî zî mojnenê ke ê zî mîyanê nê karî de yê. Sey Îdareyê Xoserî ma de derheqê kerdişanê xiraban, dizdîye, talan, qirkerdiş û vurnayîşê demografî yê Tirkîya de xeylêk dokumentî estê, ma xeylêk raporî amade kerdî û dayî dezgehanê mîyanneteweyîyan. Ma waşt Erdogan û cergê ci bêrê muhakemekerdene. Welatê pîlî, dezgehê mîyanneteweyî û Neteweyê Yewbîyayeyî ganî vera kerdişanê Tirkîya tewir bimojnê. Tirkîya pê nê polîtîkayanê xo aramî, asayîş û estbîyayîşê herême rê gef wanena, nêverdena meseleya Sûrîye pê dîyalogan çareser biba. Coka ganî Tirkîya ra hesab bêro persayene.''