'Tirkîya nêeşkena pê qerarnameyêkî Peymana Îstanbulî betal bikera'

Hemsereka OHDyî ya Amedî Avûkate Ozume Vurgun venga pêro cinîyan da ke wa wayîrê Peymana Îstanbulî vejîyê.

Tirkîya Peymana Îstanbulî ra 20ê adare de pê qerarnameyêkê Serekkomarîye xo apey ant. Hemsereka Komeleya Huqûqnasanê seba Azadîye ya Amedî Avûkate Ozume Vurgun babete ANFyî rê ercnaye.

Avûkate Ozume da zanayene ke  peymane ser o medyaya hawuze xeberê zûrî yê sey 'Peymane awanîya keyeyî ya tirkan xeripnena' vetî û vat: ''Bingeyê Peymana Îstanbulî de dewaya Nahîde Opuz esta. O çax avûkatê na dewa Merale Daniş Beştaş û Mesut Beştaş bîyî. Na dewa şîye Mehkemeya Heqanê Merdiman a Ewropa (MHME) û Tirkîya rê ceza dîyaye. Tirkîya Peymana Îstanbulî waşte û îmza kerde. Peymane armanc kena ke şîdetê vera cinîyan, şîdetê zereyê keyeyî û şîdetê vera tercîhê cînsî asreng bikera. Reya verêne Peymana Îstanbulî şîdetê vera cinîyan sey sûcê merdimîye û cîyakerîye îlan kerd û no şîdet red kerd.''

Ozume Vurgun pare kerd ke cara Tirkîya Peymana Îstanbulî 10 serrî yo nêardêne ca û vat: ''Çunke Peymana Îstanbulî mesuldarîye atfê dewlete kena û vana 'dewleta ke hemwelatîyan nêpawena sûcdar a. Nê îqtîdarî yê ke înan ra nîyê pêro sûcdar dîyî û peymane fesh kerde. Dewlete muhakemekerdişê qirkerdişê cinîyan de hîşmendîya xo ya camêrdîye mojnena. Dewlete sey peymane destkewteyanê cinîyan sey çin hesibnena. Pê qerarnameyêkî wedaritişê na peymane hîşmendîya 'tek camêrdî' mojneno. Wedaritişê peymane ra dima şîdetê vera cinîyan zêdîya. Ma herinda Peymana Îstanbulî de peymananê sey Anqara û Berlinî qebul nêkenê. Ma qebul nêkenê ke esasê edaletî hetê camêrdêkî ra bêro dayene.''

Avûkate Ozume Vurgun ard ziwan ke wedaritişê Peymana Îstanbulî dûştê qanûnan o û vat: ''Ganî ma sey cinîyan peyê na peymane de vinderê. Peymanêka mîyanneteweyî pê qerarnameyêkê serekkomarîye nêna betalkerdene. Têkoşînê cinîyan zelal o. Cinîyî vera wedaritişê peymane nêrazîbîyayîşanê pîlan mojnenê û no têkoşîn do dewam bikero. Eke Peymana Îstanbulî awanîya keyeyî xeripnena çira Tirkîya verî îmza kerda? No provakasyon o û ganî verê ci bêro girewtene. Peymana Îstanbulî ameyoxê cinîyan gêna binê garantî.''