Armenîyanê Hesekî ra Hovsep Sarkîsî vat, dewleta Tirkî sey qirkerdişê Armenîyan wazena şarê Vakur û Rojakewtena Sûrîye zî qir bika û vat, "Ganî welatê dinya zî şaşîtîya xo ra abigêrê, nê qirkerdişî vindarnê."
Hovsap Sarkîso ke Armenîyê Hesekî yo, endamê HPC'yî (Hezê Xopawitişî) yo û dikanêk de xebitîyeno ke debarê keyeyî xo biko. Sarkîsyan şewan taxe paweno û sibayan zî hetkarîya sivîlan keno ke nê sivîlî Serêkanîyê de rîyê qirkerdişî ra neçat mendê ke keyeyê xo teriknayî. Sey pêroyê işaranê Vakur û Rojakewtena Sûrîye o zî hêrsên o. La dejê ci hêrsê ci ra zêdêr o. Sarkî vano, "Tirkîya wazena reyna ma tehcîr bike, wazena reyna ma qir bike."
Hovsep Sarkîs vano 8 serran ra nata şarê Vakur û Rojakewtena Sûrîye dest danê yewbînan, birînanê xo pîya weş kenê û cuya hempare danê la Tirkîya wazena înan qir bike. Hovsep Sarkîsî bale ante Qirkerdişê Armenîyan ê 1915o ke hetê Osmanîyan ra ame kerdene, û vat: "Wextê qirkerdişê 1915 de seba ke ma bixelisê ma Tirkîya ra ameyî Sûrîye. O çax Tirkîya 1,5 Armenîyî kiştî, dest na serê keyeyanê înan. Nika zî wina beno. O çax ma xelisîyayî, ma bîyî wayîrê mal û mulkî, ma tîya de bîyî wayîrê cuyêke. Nika zî wazenê reyna ma qir bikê.
Ma şarê xo kerdî yew. 8 serran ra nata ma pîya ciwîyenê, hetkarîya yewbînan kenê, ma yewbînan fam kenê û cuyêka hempare saz kerde. Ma ci rê razî yê ke QSD'yî ma pawitî. MA nêwazenê dewleta Tirkî tîya de bibe. Ma wazenê serê erdê xo de Ereb, Kurd, Suryanîyan reyde pîya biciwîyê."
"Amerîkayîjî nê cayan de bîyî, ma hetkarîya înan kerde. MA hînî xerîbî nêwazenê. Ma wazenê ke Sûrîyeya Demokratîke bibe. Kurdî, Erebî, Armenîyî, Sûryanîyî pîya bi haştîye biciwîyê. Ma xerîbî nêwazenê, ma heqanê xo wazenê." Sarkîsî veng da Amerîka, Rûsya, welatanê Ereban û Armenîstan ke hêrişê Tirkîya bivindarnê.
