5ê teşrîna verêne ya 2021î de PDKyî bi dafikêke 5 gerîlayî şehîd kerdbî û dest nabî serê cenazayan. Meclîsê Keyeyanê Şehîdan ê Herêma Cizîre semedo ke cenazayan bigêro verê Berê Sînorî yê Sêmalka de çalakîya xeyme dabî destpêkerdene. Şarê Rojawanî hewteyêk o serê sînorî de nobete de yo.

Hogir Qamişloyo ke ciwanêkê TEV-DEMî yo, PDK hîşyar kerd û vat: ''Çend rojî yo şar tîya de çalakîye keno. Hînî sebrê şarî nêmeno. Ma sey ciwanan vanê ke eke ê cenazayan nêdê ma do sînorî birijnê. Ganî PDK ney hol bizano. Îxanetê Mesûd û Nêçîrvan Barzanîyî hînî nêno qebulkerdene. Keyeyê Barzanîyan xêrê gerîlayan ra Başûr de maneno. PKK şi hewarê Şingal, Rojawan, Kobanê.''

Dadîya Hevrîne Xelefa ke hetê cerganê dewleta tirke ra amebî qetilkerdene Suade Mistefa zî nobete de ya. Suade vat: ''Heta ke ma cenazayanê xo megêrê tîya ra nêşinê. Eke cenazayê ma destê kesan ê bînan de bibîyêne ma vatêne ê xayîn ê. La heyf ke cenazayê ma destê way û birayanê ma de yê.''

Çalakîkerî Sêmalka de xoverdayîşê gerîlayan ser o deyîran van û sloganê sey 'Bimiro îxanet, biciwîyo xoverdayîşê gerîlayan' vanê.

Dengbêjanê ke çalakîye de ca gênê venga PDKyî da û vat: ''Şehîdanê ma bidê ma. Birakûjî têna do dej bida kurdan. Ma venga PDKyî û Barzanîyan danê la goş nêdanê ma. Ganî ma birakûjî ra fek vera bidê û vera dişmenî bibê yew. Wext wextê yewîye yo.''

PDKyî Mayê Haştîye asteng kerdbî

26 Mayanê Haştîye yê Herêma Cizîre yê Rojawanî semedo ke cenazayanê Nesrîn Temir (Tolhildan Raman) û Yûsif Îbrahîm (Serdem Cûdî) bigêrê waştbi Sêmalka ra ver bi Berê Sînorî yê Pêşxabûrî şorê. La hêzanê PDKyî mayî asteng kerdî. Mayanê Haştîye pare kerdbi ke se beno wa bibo ê do cenazayanê xo bigêrê û dest pê çalakîya roniştişî kerdbî.

Goreyê agahîyanê ke çimeyanê herêmîyan ra ameyê girewtene dima ke çalakîye dest pêkerde PDK tira acîz bi û xebatkare îstîxbaratê Tirkîya serê sînorî de ca kerdî. Verî zî vejîyabi werte ke Pêşxabûr de hêzê MÎTî esto. Kesê ke semedê derbazbîyayîşê Başûrî forman dekenê verî hetê MÎTî ra îfadeyê înan yeno girewtene.