Dadîyanê şehîdan ê Rojawanî sînorê Başûrê Kurdîstanî de verê Berê Sînorî yê Sêmalka de çalakîya roniştişî daye destpêkerdene.

Keyeyanê şehîdan di hewteyan ra nata Sêmalka de çalakîya xeyme kerdêne. Keyeyî ewro zî ver bi Berê Sînorî şîyî la reyna hetê hêzanê PDKyî ra ameyî astengkerdene. Coka keyeyan dest pê çalakîya roniştişî kerde. Keyeyî  wazenê ke cenazayê 6 şehîdan wa bêrê teslîmkerdene û semedê nê waştişî wazenê mektubêke bidê Hukmatê Herêma Kurdîstanî.

Şewa 28-29ê tebaxe koma bi 7 gerîlayan wexto ke Qendîlî ra derbazê herêma Behdînanî bîyêne serê Awa Zapî de maruzê hêrişê hêzanê PDKyî mendbî.

HPGyî 3ê teşrîna verêne de hêrişî ser o na eşkerayîye dabî: ''Ame qetîkerdene ke şewa 28-29ê tebaxe de komêka ma ya bi 7 gerîlayan wexto ke warê Qendîlî ra derbazê herêma Behdînanî bîyêne serê Awa Zapî de saete 02:30 de maruzê hêrişê hêzanê PDKyî bîya. Koma ma ya gerîlayan wexto ke Awa Zapî ra derbaz bîyêne hêzanê PDKyî verî ke hîşyarîye bikerê çar baskan ra pê çekanê giranan kome girewte binê gulevarnayîşî. Qetî bi ke nê hêriş de 5 embazê ma şehîd bîyî, bi îxtîmalêkî beno ke embazêkê ma esîr bîyo. Na kome ra embaz Hakîyî bi xo serebût dî û wextêkî ra dima weş û war cayê serebûtî ra agêra. Embaz Hakîyî xo resna hêzanê ma û hêrişê PDKyî xeylêk hetan ra kifş kerd.''