Şewa 28-29ê tebaxe de koma bi 7 gerîlayan wexto ke Qendîlî ra derbazê Behdînanî bîyêne serê Awa Zapî ya Xelîfanî de maruzê hêrişê PDKyî bîye.

HPGyî derheqê hêrişî de 3ê teşrîna verêne de na eşkerayîye dabî: ''Ame qetîkerdene ke şewa 28-29ê tebaxe de komêka ma ya bi 7 gerîlayan wexto ke warê Qendîlî ra derbazê herêma Behdînanî bîyêne serê Awa Zapî de saete 02:30 de maruzê hêrişê hêzanê PDKyî bîya. Koma ma ya gerîlayan wexto ke Awa Zapî ra derbaz bîyêne hêzanê PDKyî verî ke hîşyarîye bikerê çar baskan ra pê çekanê giranan kome girewte binê gulevarnayîşî. Qetî bi ke nê hêriş de 5 embazê ma şehîd bîyî, bi îxtîmalêkî beno ke embazêkê ma esîr bîyo. Na kome ra embaz Hakîyî bi xo serebût dî û wextêkî ra dima weş û war cayê serebûtî ra agêra. Embaz Hakîyî xo resna hêzanê ma û hêrişê PDKyî xeylêk hetan ra kifş kerd.''

Gerîla Hakî Zîlano ke hêrişê PDKyî ra xelisîya qala embazanê xo kerde:

''Verî ke ez tewra na kome bîya mi embazê kome nêşinasnayêne. Verî ke ma kewtî rayîr ma yewbînî şinasnayî. Koma ma wayîra moral û xeyalanê pîlan bîye. Pêro embazê ke kome de bîyî wayîrê tecrubeyê şerî bîyî. Embaz Şoreş Mêrdîn embazêko kahan bi. O bi serran koyanê Kurdîstanî de mendbi. O herêma Dengizê Sîyayî û waranê Vakurê Kurdîstanî yê sey Dêrsimî de mendbi. Ey bedelê giranî dabî. Çimê ey şer de birîndar bibi û protez bi. Ma tim waştêne o ma rê qala serebûtanê Dengizê Sîyayî bikero. Ey zî key ma mabên dayêne qala ci kerdêne.

Embaz Serdem û Şoreş Colemêrg rayîrzanê kome bîyî. Embaz Serdem embazêko rîhuyaye bi, kelecanê ci zaf bi û ey vindertiş nêzanayêne. Embaz Serdem kedkar bi, bara girane yê ey bîye la nêverdayêne ma dest bierzê bara ci. Embaz Serdem tim embazê xo fikirîyayêne û goreyê ney nêzdî bîyêne. O raywanîya ma de vernî de bi, rayberîya ma kerde. Embaz Şoreş Colemêrg zî rayîrzan (kurye) bi. Ey zî embaz Serdemî zî waştêne ke şorê waranê Vakurî. Embaz Şoreş Colemêrg tim bi kelecanî bi û xo semedê pratîkanê giranan amade kerdêne. Ey waştêne pê beşdarîya xo cewab bido prosesî. Wezîfeyê ci o bi ke peyê kome ra şoro û kome bipawo.

Embaze Brûsk Munzur embazêko kedkar bi, ma raywanîye de yewbînî şinasnayî. O bi mesuldarîye wayîrê erkanê partîye bîyêne. Embaz Brûskî şoro kamca rayberîye kerdêne. O qetî deqayêke nêvindertêne. Qetî çîyêk kerdêne, kede dayêne. 

Koma ama de embaze Axîne pê coşê xo şinasîyayêne. A Başûrê Kurdîstanî ra tewra partîye bîya. Aye zaf waştêne ke şora warê Dêrsimî. Aye govende ra zaf hes kerdêne. Eke a sergovende nêbîyêne govende nêgirewtêne. Xora semedê gerîlayan govende sey tradîsyonêkî çimeyê moralî bîye. Ma zî verî ke bikewê rayîr govenede girewte.

Embaze Tolhildane zî mi raywanîye de şinasnaye. Raywanîya ma de ge ge roşnîya şaristanan dûrî ra asayêne. Embaze Tolhildane rayêke vat 'Ez pê bawer a ke wexto ke merdim şaristanî ra biewna tîya raywanê koyan nêvîneno. La kam bizano ke nika 7 gerîlayê azadîye koyan ra şinê.' Embaz Şoreş Mêrdînî zî ney ser o vat 'Oyo ke tîya ra derbaz beno têna komêka gerîlayan nîyo tarîxêk o.' Kamî bizanayêne ke 3 rojan ra dima nê gerîlayî do şehîd bibê.

Na raywanîye de vîrameyîşanê embazanê mi ez payan ser o vindarnaya. Mi wina hîs kerdêne ke embazî hê kişta mi de yê. Mi embazî cayê xo de hîs kerdêne û ney hêz dayêne mi. Rayîr de çimê mi rêçê înan de bîyî. Ez rayîran ra gêrayêne rêçê mekapanê embazan. Rojan ra dima binê kerrayan de mi rêço winasên dî. Mi fam kerd ke ez nêzdîyê cayê embazan bîya. Ê helan de çîyê ke embaz Şoreş Mêrdînî Dengizê Sipî de ciwîyabî ameyêne mi vîrî û mi nê çîyî xo rê kerdêne tecrube.

Ez cayo ke mi xo kamufle kerdbi de 2 rojî menda. Dima ez semedo ke xo biresna embazan têgêraya. Mi Behdînan nêşinasnayêne. Ez ve rbi Behdînanî kewtî rayîr û hêraya embazan. Hêriş de mekapê mi zî mi pay ra vejîyabîy. Ez lingwarve rayîr a şîya. Mi kincê xo ra her deqa parçeyêk tira kerd, best linganê xo ra ke bieşka şora. Wexto ke ez cayê serebûtî ra tikî kewta dûrî ez ewnîya ci ra; uca de qet yew noqtaya leşkerî çinbîye.

Mi xo verda daristanêk. Zereyê nê daristanî ra patîkayêke derbaz bîyêne. Mi na patîka teqîb kerde û mi di embazê cinîyî dîyî. Ez zaf kêfweş bîya, mi venga înan da vat 'Şima heval ê?' Înan vat heya. Mi reyna heman perse nînan ra persa. Mi embazan rê qala serebûtî kerde. Wird embazî zî mat bîyî. Dima ke mi embazan ra tarîxê a roje pers kerd ez pê hesîyaya ke 16 rojî yo ez ha rayîr de ya. Tesadufêko manadar bi çunke nameyê nê wird embazan Hêvî û Roje (Tîje) bîyî. No mi rê ameyêne a mana ke ez bi hêvî ver bi tîje yanî ver bi partîye şina.''