Hêrişê îşxalî yê dewleta tirke yê vera Rojawanê Kurdîstanî zêdîyayî. Tewr peyên cerganê Heyet El Şamî Efrîn reyna îşxal kerd û ney zî qesawetê serê îşxalêkê neweyî vist rojdem.  Temsîlkara Îdareyê Xoserî yê Rojawanî ya Silêmanî Evîne Swêd derheqê babete de ANFyî rê qisey kerd.

Evîne Swêd vist vîrî ke wexto ke dewleta tirke 2018 de Efrîn îşxal kerdbi şarê Efrînî 58 rojan xo ver dabi la bêvengî û hêrişanê hewayî ra şar peynî de neçare mendbi ke koç bikero. Evîne Swêd pare kerd ke dima Efrîn de cergî ameyî cakerdene û înan sûcê şerî kerdî.

Evîne Swêd vat: ''Cerganê dewleta tirke dest na zeytûnêranê şarî, cayê fîrazî yê êzidî, xirîstîyan ûsn. xera kerdî, mal û mulkê şarî diznayî, cinîyan rê tecawuz kerd, sivîlî remnayî kiştî. Nê sûcî hema zî Efrîn de dewam kenê. Efrinijê ke bîyê koçber têna wazenê abigêrê şaristanê xo, zerrîya înan de têna na hêvîye est a. 

Efrîn de zaf cergî ameyê cakerdene. Nika nê cergî kewenê pê, şewe û roje şer kenê. Şerê înan zî seba talan û dizdî yo. Heyat Tehrîr El Şamî zî verê xo da Efrînî. Sûc û binpaykerdişê nê cergan yenê belgekerdene û qeydkerdene. Dewleta tirke cergê Heyet Tehrîr El Şamî ca kerdî. Wextê peyênî de tay komê cergî verê Tirkîya vejîyayî, qayîl nêbîyî waştişanê Tirkîya bîyarê ca. Heyet Tehrîr El Şamî nameyê Tirkîya ser o nê cergan kontrol keno. Dewleta tirke pê Heyet Tehrîr El Şamî amadekarîya hêrişêkê neweyî kena.''

Swêde derheqê pêvînayîşanê Tirkîya û Sûrîye de vat: ''Tirkîya seba ke kurdan û şaranê Sûrîye rayîrê şorişî ra biaçarna, seba menfaetanê xo bişuxilna her çî kena. Pêvînayîşê bi Tirkîya xizmetê şarê kurdî û şaranê Sûrîye nêkenê. Dewleta tirke têna armanc kena ke qirkerdişê xo temam bikera. Îdareyo Xoser tim wazeno îdareyê Sûrîye de pêvînayîşan bikero. Xora Îdareyo Xoser xo sey parçeyêkê Sûrîye hesibneno.''

Evîne Swêd peynî de bale ante şerê muxtemelî ser û vat: ''Her kes hesabê şerî keno. Beno ke xeylêk dewletî bikewê mîyanê şerî. Amadekarîyê şaranê Rojawanî zî est ê. Dişmen bi israrî wazeno qirkerdişêk bikero. No şer beno ke pêro herême ra vila bibo, seba ke ma nêbê qurbanê nê şerî, sey armanî û sûryanîyan qir nêbê wa her kes nê şerî rê amade bibo. Nêbê qurban, destkewteyanê xo bipawê, pîlêr û mende bikerê. Bi yewî û paştdayîşî ma eşkenê ser bikewê.''