Vervatoxê Yewinanê Pawitişê Şarî (YPG) Nûrî Mehmûdî derheqê raporê Neteweyanê Yewbîyayeyan de eşkerayîyêke daye. Raporê bi nameyê 'Doman û Alozîyanê Çekdaran' 6ê gulana 2020î de ame parekerdene û rapor de ame îdîakerdene ke YPG domanan gêno binê çeke.

Eşkerayîya YPGyî de ame vatene ke YPG girêdayîyê pêro peymanan ê mîyanneteweyîyan o. Nûrî Mehmûdîyî ard ziwan ke ê qetî mîyanê yewinanê înan de domanê 18 serre ra qijêrî çin ê û ê destûr nêdanê tewrbîyayîşê domanan.

Mehmûdîyî cewab da îdîaya bîne zî û pare kerd ke ê qetî dibistanan semedê armancanê leşkerîyan nêşuxilnenê. Mehmûdîyî îfade kerd ke NYyî ê pê 'remnayîşê sivîlan' sûcdar kerdo û na îdîaya NYyî zî qetî raşt nîya.

Mehmûdîyî vat: ''Hêzê ma mabênê Îdareyê Xoserî û rejîmê Sûrîye de tim mabênçîtîye kenê û seba aramîya herême xebitîyenê. La raporê NYyî nê raştîyan mîyan kenê. Îmkanê ke NYyî dayê têna hetê domananê rejîmê Sûrîye û Tirkîya yenê şuxilnayene. Domanê herêmanê Îdareyê Xoserî pê bahaneyan hetê nê rejîman ra heqanê xo ra dûrî yenê vistene.''