Endama Îdareyî ya Meclîsê Sûrîyeya Demokratîke Zênebe Qenber birnayîşê awa Firatî ser o qisey kerd û da zanayene ke awa Firatî ser o heqê Sûrîye zî esto. Zênebe Qenber bêvengîya warê mîyanneteweyî rexne kerde.
Endama Îdareyî ya Meclîsê Sûrîyeya Demokratîke Zênebe Qenber birnayîşê awa Firatî ser o ANFyî rê qisey kerd. Zênebe Qenber vera mesele nêrabîyayîşê xo mojna.
Zênebe Qenber îfade kerd ke dewleta tirke tim sîyasetê barbaran ana ca û vat: ''Tirkîya verî Efrîn dima zî Serêkanîyê û Girê Sipî îşxal kerdî. Pê zorî roniştoxî nê cayan ra vetî. Tewr peyên zî dewleta tirke destkewteyanê Rojawanî ra tehamul nêkerd û awa Firatî birnaye ke awa Firatî ser o heqê Sûrîye zî esto. Heqê merdiman o ke awa erdê xo ra îstîfade bikerê. Çîyo ke Tirkîya kena bêxlaqî ya.''
Zênebe qiseykerdişê xo rê wina dewam kerd: ''Ma sey şaranê Sûrîye wazenê pê kultur û tarîxê xo biciwîyê. La dezgehê heqanê merdiman ney çin hesibnenê çubke paştî danê dewleta tirke. Ma sey cinîyanê Rojawanî eşkera kenê ke xoverdayîşê ma do dewam bikero. Ma pêro dinya rê vanê hînî bes o, şîyar biba. Ma wazenê seserra 21. de hînî cuyêka arame biciwîyê.''
