Dima ke dewleta tirke Girê Sipî îşxal kerd 100 hezar merdimî neçare mendî ke koçê Reqa, Tebqa, Eyn Îsa û dewanê înan bikerê. Îdareyê Xoserî 2019 de seba nê roniştoxan Kampa Multecîyan a Girê Sipî ronaye ke tede hezar û 260 keyeyî û 6 hezar û 500 merdimî manenê.

Îdarekarê Kampa Multecîyan Mihemed Elî derheqê rewşe de ANFyî rê qisey kerd. Elîyî da zanayene ke kampe waştişê şarî ser o awan bîya û vat: ''Kampe de şarî sîstemê xo yê komun, meclîs, perwerde, weşîye û asayîşî awan kerdî. Şar têna armanc keno ke abigêro wareyanê xo û xebatanê xo zî nê esasî ser o keno. Na kampe mîyanê çolî de ya. Coka îdarekerdişê ci zî zehmet o. La şar rixmê hende çîyî zî xo ver dano.''

Îdareyê Weşîye yê Kampe ra Çawîş Hesenî pare kerd ke beşê weşîye de meseleyê înan zaf ê û vat: ''Pêro lazimîyî hetê Îdareyê Xoserî ra yenê peydakerdene la qîm nêkenê. Têna yew ambulans û yew doktor est o. Dermanxaneyî de dermanî kêm ê. Ma têna eşkenê reşwanê lezabezan de mudaxele bikerê, dima nêweşan sewqê Eyn Îsayî, Reqa û Qamişloyî kenê. Ganî dezgehê hetkarîye paştî bidê ma. Heta nika qet yew dezgehî hetkarîya ma nêkerde.''

Vervatoxa Perwerdeyî ya Kampa Girê Sipî Roza Îsa Osman zî îfade kerd ke kampe de hîrê dibistanî est ê û vat: ''Verî kampe de têna yew dibistan est bîye la nika hîrê dibistanî est ê. Bi temamî hezar û 650 wendekarî û 100 mamostayê ma est ê. Ma bi kurdkî û erebkî perwerde danê. Ma kenê ke mîyanê nê şertanê koçberîye de zî domanî wa sîstemê perwerdeyî ra bêpar nêmanê.''