Tirkîya  Planê Çalakîye de yo ke teqdîmê Komîteya Wezîran a Konseya Ewropa kerd, vat ê do semedê tepişteyanê ke cezaya muebetê giranî dîyaya ci 'heqê hêvî' ca nêarê. Dewleta tirke Rayber Apo heqê hêvî ra bêpar tepişt.

Avûkatanê  Rayber Apoyî ra Wekîla DEM Partî ya Şirnexî Newroze Uysal derheqê babete de ANFyî rê qisey kerd.

Newroze Uysal wina vat: ''Planê çalakîye yê hukmatê AKPyî yê panc pelan de çîyêk çîn o. Çîk nêvato, taahutê derheqê muebetê gîranî ca nêardî, persê wezîrîye cewab nêkerdî têna prosedurêk ard o ca. Ma sey avûkatan, wekîlanê DEM Partî û dezgehanê heqanê merdiman ê Tirkîya hende muracatî kerdî, zanayîş dayî qet qala înan nîna kerdene. Hem qerarê Mehkmeya Qanûnê Bingeyî, paketê qanûnî yê ke meclîs de pawenê, hem zî Tirkîya de hema cezaya muebetê giranî yena dayene, wina hende rewşa raşte est a la qet cewabê înan nêameyo dayene. Planêkê çalakîye yo teknîkî û bêberpirsîyar o.''

Newroze Uysal ard ziwan Tirkîya nêeşkena 'heqê hêvî2 ra birema û nê vatî: ''Verî gerek vera nê planê çalakîye bi çar qeraran ê derheqê Gurban, Kaytan, Boltan û Ocalanî de zanayîş bêro dayene û bêro waştene ke wa kombîyayîşê êlule de qerar bêro nuştene. Komîte vatbi eke heta êlula 2025î gamê ke yenê pawitene nêrê eştene ê do qerar hazir bikerê. Nika ma ver bi êlule şinê, planê çalakîye est o la tede bedilnayîşêko pêt çîn o. Coka gerek komîte roniştişê xo yê 2025î de Tirkîya rê derheqê Ocalanî de taslagê qerar binuso û  hêzê xo yê dîplomatîk û huqûqî ramojno. Hukmatê AKP nêeşkeno 'heqê hêvî' ra biremo û bikero babeta bazarîye. Eke Komîteya Wezîran a Konseya Ewropa na mesele zemanî ra vila mekero, têna qale de meverde û raşta şiro Tirkîya ser bedilnayîş mumkun o.''