Naif Îşçîyo ke qezaya Cizîre ya Şirnexî de 2010 de ame destbendkerdene û dima ra bi îdîya ''endamîya rêxistine'' ame tepişene cezaya 24 serran dîyaye ci. Mehkemeya Berze semedê serranê ci cezaya ci arde war kerde 16 serrî. Îşçî goreyê şertanê normalan ganî 27ê tebaxa 2023yî de biameyêne tehlîyekerdene.La tehlîyeya Îşçîyî xeylêk reyî bi seba ke tewrê grevê vêşanîye pîyo û poşman nêbîyo peyde ameye eştene.

Heyetê Çimdarî û Îdareyê Zîndanê Tîpê Tyî yê Ahlatî 1ê tebaxe de qerar girewt û tehlîyeya Îşçîyî 3 mengî peyde eşt. Badê nê qerarê Naif Îşçî 2ê tebaxe de dest pê grevê vêşanîye kerd. Îşçîyî Merkezê Pêroyî yê Komeleya Heqanê Merdiman (ÎHD) rê mektûb nuşt û qala bêhuqûqîya ke raştê ci ameyo kerd.

Îşçîyî ard ziwan ke binpaykeridşê heqan çend şinê zêdîyene û vat: ''Goreyê qanûnê înfazî wextê mi bîyo de. Ganî ez 27ê tebaxa 2023yî de biamêyene tehlîyekerdene la bi caardişanê keyfîyan ê heyetê zîndanî hema zî tehlîye nêbîya.  Tehlîyeya mi û 6 tepişteyanê bînan ameye peydeeştene. Her hîrê mengan de hey mi ra persanê sey ''PKK rêxistina terorî ya'', ''Ti derheqê Abdullah Ocalanî dir senî fikiryenî'', ''Qey ti koguşê bihetî de manenî'', ''Ti sûcê xo qebul kenê''  persenê. Heyetê zîndanî sey mehkeme têgêreno. Mudirê zîndanî xo ra îdeolojîk nêzdî beno û endamanê heyetî ser o tesîr keno. Vera na bêhuqûqîye ez rixmê nêweşanîyanê xo yê giranan kewta grevê vêşanîye ya bêdemî û heta waştişê mi bêro ca ez do dewam bikerî. Îdareyê zîndanî herinda caardişê waştişê mi de bi cezaya dîsîplînî cewabê mi da.''