Komeleya Rojnamegeran a Dîcle Firatî (DFG) raporê menga adare yê derheqê binpaykerdişê heqanê rojnamegeran de eşkera kerd

Rapor de ame vatene ke peynîya sibate ra heta adare zaf rojnamegerî ameyî destbendkerdene û tepiştene û ame vîrvistene ke rojnamegerê ke derheqê endamê MîTî de ke Lîbya de merd xebere viraştbi derheqê înan de tehqîqat dîya destpêkerdene û vat xebatkarê Oda TVyî, rojnameyê Yenî Yaşamî û Yenî Çagî çarçewa na dosya de ameyî destbendkerdene û tepiştene. DFGyî vat: ''No nêzdîbîyayîş vera çapemenîya azade û azadîya îfadeyî darbeyêka girane yo.

DFGyî vurnayîşê înfazê ceza vist vîrî û waşt ke pêro tepişteyê sîyasîyî û rojnamegerî cade bêrê veradayene.

DFGyî raporê xo de eşkera kerd ke prosesê vîrusê Korona de teda û zorbazîye, destbendkerdişî, tehqîqatê vera rojnamegeran dewam kenê û xeylêk rojnamegerî û xebitnayoxê medyaya komelkîye seba ke vilakerdişanê xo de îfade kerd ke vera vîrusê Korona tedbîrê qîmî nênê girewtene ameyî destbendkerdene.

Rapor de ame vîrvistene ke Tirkîya û Vakurê Kurdîstanî de 103 rojnamegerî tepişte yê, adare de 15 rojnamegerî ameyî destbendkedene, 8 rojnamegerî ameyî tepiştene, derheqê 12 rojnamegeran de tehqîqat dîya destpêkerdene, derheqê rojnamegerêkî/e de dewa ameye akerdene, 5 rojnamegeran rê ceza ameye dayene, dewaya 18 rojnamegeran dewam kena, keyepelêk ame astengkerdene û rojnamegerêk/e karî ra ame/ye vetene.