Merkez û qezayanê Colemêrgî de 15ê tebaxe de Dayîşê Haştîye zî tede 23 kesî ameybî destbendkerdene.  Dayîkê Haştîye Adalete Safali û Perîşane Akçelîk û lajê Akçelîke Cîhan Akçelîk  ewro pîya bi avûkat Erdal Safali seba ke îfade bidê şîyî Wan. Dozger cayê xo de nêbi, coka ey peyser agêrayî Gever.

Dayîkan rayîrê agêrayîşî yê Gever-Wanî de  qeza kerd, wird Dayîkanê Haştîye cayê qewimîyayîşî de dinyaya xo bedilnaye.

Erdal Safali û Cîhan  Akçelîk yê ke bi giranî birîndar bîyî, wedarîyayî Nêweşxaneyê Dewlete yê Colemêrgî. Birîndaran ra Cîhan Akçelîk  rayîrê nêweşxaneyî de dinyaya xo bedilnaye. Avûkat Erdal Safali zî Nêweşxayê Dewlete yê Colemêrgî de servîsê ciewnîyayîşê giranî de yeno tedawîkerdene.

Adalete Safali dewa Memkava de ameye definkerdene. Perîşane Akçelîk û lajê ci Cîhan Akçelîk zî do siba serê sibayî dewa Yarinşahê de bêrê definkerdene.