Komeleya Rojnamegeran a Dîcle-Firatî (DFG) bi wesîleya serrgêra 4ine ya ronîyayîşê xo bînaya xo ya Amedî de ''Raporê Binpaykerdişê Heqanê Rojnamegeran ê 2023yî eşkera kerd. Hemserekê DFGyî Serdar Altan, endam û îdarekarê komele û xeylêk rojnamegerî tewrê eşkerayîye bîyî.

Rojnameger Hakki Boltanî rapor wend. Boltanî hêverî serrgêra ronîyayîşê DFGyî fîraz kerde. Boltanî dima doneyê raporê 2023yî wendî.

Boltanî vat: ''Goreyê Federasyonê Rojnamegeran ê Mîyanneteweyîyî (IFJ) 2023 de 11ê ci cinîyî 120 rojnamegerî ameyî qetilkerdene û se ra 68ê înan Gazze de kişîyayî. Hetê bînî ra Edîtorê Rojnewsî Silêman Ehmedo ke hetê PDKyî ra amebi remnayene ey ra 72 rojî yo xeberêke nêna girewtene. 2023 de Erdlerzê Mereşî de 25 xebatkaranê çapemenîye dinyaya xo bedilnaye.

 Sey serranê bînan 2023 de zî rojnamegerî raştê teda, hêriş, destbendkerdiş û tepiştişî ameyî. 2022 û 2023 de operasyonanê vera rojnamegeranê kurdan de xeylêk embazê ma tepişîyayî. Hemsereka DFGyî Dîcle Muftuoglu zî mîyanê nînan de ya û hema zî zîndan de ya.

Îqtîdarê AKP-MHPyî 2023 de bi kerdişan û operasyonanê vera çapemenîya azade mesajê 'Ma do destûr nêdê ke şima karê xo bikerê' da. 

2023 de 280 rojnamegerî ameyî muhakemekerdene, 36 rojnamegerî raştê hêrişî ameyî, hêzanê asayîşî eşt keyeyanê 43 rojnamegeran ser, 119 rojnamegerî ameyî destbendkerdene, 36 rojnamegerî tepişîyayî, 64 rojnamegerî raştê kerdişanê xiraban ameyî, 38 rojnamegeran rê ajanîye ameye teklîfkerdene, 110 rojnamegerî wextê teqîbê xeberan de ameyî astengkerdene, zîndanan de 37 rojnamegerê tepişteyî raştê binpaykerdişê heqan ameyî, derheqê 75 rojnamegeran de tehqîqatî ameyî akerdene, derheqê 66 rojnamegeran de dewayî ameyî akerdene, 44 rojnamegeran rê cezaya zîndanî û pereyî ameye dayene, 821 rojnamegerî hema zî yenê muhakemekerdene, zîndanan de 57 rojnamegerî est ê, 58 rojnamegerî karî ra ameyî vetene, RTUKî ceza daye 68 weşanana, 112 xeberî ameyî qedexekerdene, 83 keyepelê medyaya dîjîtale ameyî qefilnayene, 7 hezar û 106 xeber û 3 hezar û 761 tedeyîyê medyaya dîjîtale ameyî astengkerdene.''