Sere de Anqara, Îstanbul û Îzmîr de 32 şaristanan de îdarekarê DEM Partî zî tede bi seyan kesî ameyî destbendkerdene.

Îstanbul de çarçewa tehqîqatêkê Serdozgerîya Komare ya Îstanbulî de îdarekarê Rêxistina DEM Partî ya qezayanê Esenyurt û Başakşehîrî zî tede  11 kesî bi îdîaya 'propagandaya rêxistine' ameyî destbendkerdene. Derheqê 6 kesanê bînan de zî bira destbendkerdişî est a.

Tekîrdag, Bursa, Çanakkale û Kocaelî de polîsan eşt xeylêk keyeyan ser û Tekîrdag de 9 kesî destbend kerdî.

Anqara de 20 kesan ser o zî bi îdîaya 'propagandaya rêxistine' bira destbendkerdişî est a. Sereştişan de Murat Çoban ame destbendkerdene.

Qezaya Şahînbeyî ya Dîlokî de sereştişan de Fatma Vesek ameye destbendkerdene.

Îzmîr de zî serê sibayî sereştişan de Aktîvîsta Tevgera Jinên Azad (TJA) Emine Înan, hemserekê Komeleya Paştdayîş û Hetkarîye ya Merdimanê Vînkerdeyan (ANYAKAYDER)  Rahime Turan û Mikail Atan û îdarekara komele ya bajarî Zarife Sungur ameyî destbendkerdene.

Wezîrê Karanê Zereyî yê Tirkîya Alî Yerlîkayayî hesabê xo yê Xî de pare kerd ke 32 şaristanan de 208 kesî ameyî destbendkerdene.