Komeleya Huqûqnasan a Seba Azadîye (OHD) Amede derheqê tecrîdê Îmraliyî de kombîyayîşê çapemenîye kerd. Îdarekarê OHD, ÎHA, MED TUHAD-FEDî û baroyanê Amed, Wan, Mersin, Riha, Colamêrg, Êlih û Mêrdînî ra xeylêk avûkatî tewrê ci bîyî.

Îdarekara Pêroyî ya Merkezê OHDyî Ekîne Yeter vist vîrî ke Avûkatî Rayberê Şarê Kurdî Abdullah Ocalanî reyde tebaxa 2019î  ra û tepişteyanê bînan ê Îmraliyî Hamili Yildirim, Omer Hayrî Konar, Veysî Aktaşî reyde adara 2015 ra nata nêeşekEnê pêvînayîş bikerê û vat: ''Huqûqê mîyannetweyî yeno binpaykerdene. Semedê Îmraliyî qesaweto pîl est o. Coka ganî cade pêvînayîş bêro kerdene. Temsîlkarê dezgehan û serekê baroyan zî tede ma sey 775 avûkan seba ke 10-17ê hezîrane de Îmrali de pêvînayîş bêro kerdene muracatê Serdozgerîya Komare ya Îmraliyî kerd.''

 
Hemserekê Pêroyî yê OHDyî Bunyamîn Şekerî zî vat: ''Bi serran o bi bahaneyanê cîya cîyayan pêvînayîşê Îmraliyî yeno qedexkerdene. Ma pîya bi 768 avûkatan deklarasyon weşana ke wa Wezîrîya Edaletî çîyêk bikero. Ma muracatê CPT û Konseya Ewropa kerd la ma tîya ra zî netîceyêke nêgirewt. Nika ma sey 775 avûkatan wazenê şirê Îmrali de tepişteyan zîyaret bikerê. Reyna dezgehê Ewropa yê ke paştî danê ma, ma muracatê înan zî kerd.  Ma tîya ra reyna veng danê wa qedexeyê pêvînayîşan bêro wedaritene. Birêz Abdullah Ocalan û hîrê tepişteyê bînî avûkatanê xo bivînê.''

Hemserekê Pêroyî yê ÎHDyî Ozturk Turkdogan zî vat: ''Ma sey komele tim vanê ke wa zîndanê Îmraliyî bêro qefilnayene. Qedexeyê pêvînayîşê Îmraliyî pêkerdişanê mîyannetweyî binpay kenê. Ma paştî danê muracatê pêvînayîşê yê 775 avûkatan. Ma tecrîd qebûl nêkenê û vanê ke ganî cadê pêvînayîşî bêrê kerdene.  Ma hêvî kenê no muracat yeno qebûlkerdene, hukmat û dewlete game erzenê. Ma zanê ke wedaritişê tecrîdî verê prosesê haştîye akeno.''

Hemserekê Baroyê Amedî Nîhat Erenî zî muracatê verêne ke înan kerdî û bêcwab mendî bale ante înan ser û vat: ''Ma wazenê ke wa goreyê huqûqî bêro têgêrayene. Heqê heme tepişteyan est o ke avûkat û merdimanê xo bivînê. Ma sey Baroyê Amedî vanê ke ma tim semedê muracatan paştî danê merdimanê tepişteyan.''

Hemserekê MED TUHAD-FEDî Zekî Baran zî vat: ''Ma pêro zanê ke gama ke Birêz Ocalanî de reyde pêvînayîşî nêbenê sebeno. Coka muracatê 775 avûkatan muhîm o. 12ê hezîrane de ver bi Gemlikî do rayraşîyayîş bêro kerdene. Ganî ma pêro berpirsîyarîya xo bîyarê ca tewrê nê rayraşîyayîşî bibê. Haştîye û azadîye xo bi xo nînê, ganî kede bêro dayene û têkoşîn bêro kerdene. Ma pê bawer ê ke bi şiknayîşê tecrîdî do haştîye bêro.''