Mayanê Şemeyî ke waşt ver bi Meydanê Galatasarayî rayra şirê hêna ameyî astengkerdene. Polîsanê tirkan xeylêk kesî destbend kerdî. Hetê bînî ra xeylêk bajaran de çalakîyê paştdayîşî ameyî kerdene.
Mayanê/Merdimanê Şemeyî hewteyê 957. yê çalakîya xo de hêna waşt semedê persayîşê aqibetê merdimanê xo yê ke bi destê dewlete ameyî vînîkerdene û muhakemekerdişê qetilkaran, Meydanê Galatasarayî de eşkerayîye bidê.
Wekîlê Partîya Çep a Keske û EMEPî, pawitoxê heqanê merdim û temsîlkarê rêxistinanê cinîyan tewrê çalakîye bîyî. Mayanê Şemeyî ke bi vilikan waşt ver bi Meydanê Galatasarayî şirê rîyê qerarê 'qedexe'yî yê Qaymeqamîya Beyogluyî ra ameyî astengkerdene. Hemsereka Pêroyî ya ÎHDyî Erene Keskîn vat ê goreyê qerarê Mehkemeya Qanûnê Bingeyî têgêrenê ke qaymeqam na mehkemeya cor nîyo.
Mayanê Şemeyî ra Hanife Yildiz zî vera polîsan nêrazîbîyayîş mojna û vat: ''Şima lajê mi vîn kerd, ez heqê lajê xo wazena. Şima nêeşkenê fotografê lajê mi bidirnê ,vilika mi bierzî erd. Şima mecbûrê ke ma mayan rê hurmet bikerê. Ez şima ra lajê xo wazena ke şima mi ra girewt. Şima mi ra çi wazenê? Têna ganê mi est o, ey zî bîgêrê.''
Polîsan reyna hêrişê mayan û pawitoxanê heqanê merdiman kerd û Erene Keskin zî tede 30 kesî destbend kerdî.
Hetê bînî ra xeylêk bajaran de semedê Mayanê Şemeyî çalakîye paştdayîşî ameyî kerdene.
