Wekîlê HEDEPî yê Îstanbulî û Hemvervatoxê Kongreya Demokratîke ya Şaran (HDK) Cengîz Çîçekî derheqê grevê vêşanîye yê tepişteyan ê vera tecrîdê Îmraliyî de ANFyî rê qisey kerd.

Cengîz Çîçekî bale ante Hemleya 'Abullah Ocalanî rê Azadîye, Meseleya Kurdan rê Çareserîya Sîyasîye' ser û pare kerd ke heta ke azadîya Ocalanî nêra caardene na hemle do dewam bikera. Çîçekî ard ziwan ke na hemle û grevê vêşanîye yê tepişteyanê PKK û PAJKî xîretê girîngî yê û vat: ''Dewlete û îqtîdarê AKP-MHPyî game bi game tecrîd giranêr kerd. Coka ganî no proseso newe yê çalakîyan sey ê verî nêbo. Birêz Ocalan seba ke muxatabo verên ê meseleya kurdan o azadîya ci zaf girîng a.

Xoverdayîşê zîndanan venga komelî dano ke tewrê prosesî bibo. Ma verê cû zî no rexne kerd ke êyê ke teber de yê bara embazanê zîndanan nêgênê xo ser. Nika no grevê seba her kesî mesajêk o ke qala kêmasîyanê ma keno.''

Çîçekî da zanayene ke çinkerdişê sîstemê Îmraliyî, caardişê azadîya Abdullah Ocalanî ganî rojdemo bingeyîn bibo û vat: ''Nêzdîbîyayîşê Birêz Ocalanî bîyo destpêkê nêzdîbîyayîşanê şarê kurdî û têkoşînê kurdan. No şer, tasfîye, qirkerdişê kultur û sîyasîyî pêro Kurdîstan de yenê caardene. Şiknayîşê tecrîdî do bibo manaya çinkerdişê polîtîkayanê qirkerdişî. Na babete de ma mîyanê metodanê çalakîye de teng mendî. Wextê neweyî de ganî çalakîyê ma hîna zengîn û afernayox bibê. Wexto newe do nêbo tekrarê verênî, do bibo wextê têkoşînî yo newe. Ma do rîpelanê neweyan ê tarîxê xo yê rûmetênî biafernê.''