Hemserekê Komeleya Rojnamegeran a Dicle Firatî (DFG) Selman Çiçekî yê ke  ANFyî rê qisey kerd vat Tirkîya de azadîya çapemenîye çîn a, xora raporê dezgehanê çepemenîye yê mîyanneteweyî zî nê mojenê ra.

Çiçekî nê vatî: ''Îqtîdarê AKPyî seba ke polîtîkayanê xo yê şerî û feqîrîye binimno verî çapemenîye hedef geno. AKP wexto ke newe bi îqtîdar verî tay grûbê medya ernayî ke xizmetê ci bikerî.  Nika çapemenîya muxalîf û azade bi îmkananê xo raştîyan resnena şarî. Coka îqtîdar wazeno vengê çapemenîya azade û muxalîfî bibirno. Seba ke dezgehê çapemenîye xizmetê îqtîdarî kenê însanî xeberanê raştan nêgenê. Tirkîya de gama hedîseyêke bena 8 rojnameyî eynî  manşetî nusenî. Eşkerayo ke heme xeberî yew ca ra vejîyenê. Coka heqê xebergirewtişî yê komelî yeno astengkerdene. Sîteyê xeberan zî yenê astengkerdene.

Rojnamegerê ke peyê heqîqetî de yê raştê hêrişê îqtîdarî yenê. Meseleya rojnamegeranê tepişteyan meseleyêka muhîm a. 40 rojnamegerî nika zîndan de yê. Pêro zî bi îfadeyê şahîdê/a mîyanî/e ameyî tepiştene. Tirkîya de rojnamegerîye sey sûcî yena hesibnayene. Ganî ma rojnemegerî seba ke verê nê bîgêrê, xo rêxistin bikerê. Ma çend hêzê xo bikerê yew, ma hende eşkenê îqtîdarî rê peyser game bidê eştene. Îqtîdar hêzê rêxistinkerdeyî ra terseno.  Seba ke ma bieşkê rojnamegerîye bipawê ganî ma rêxistinkerde têkoşîn bikerê.''