Wekîlê Partîya Çep a Keske yê Îstanbulî û Hemvervatoxê HDKyî Cengîz Çîçekî derheqê prosesê rexnekerdiş û rexnedayîşî yê HDPyî de ANFyî rê qisey kerd.

Çîçekî bale ante ser ke şarî bedelê giranî dayê û bîyo polîtîk û ard ziwan ke bingeyê rexneyan de ferasetê 'komelbîyayîşê bêkomelî' û 'şarbîyayîşî ra şar' est ê. Çîçekî dîyar kerd ke prosesê rexnekerdiş û rexnedayîşî şarî reyde ame kerdene.

Çîçekî pare kerd ke hînî înan dest pê prosesê konferansan kerdo û no proses zî do pê nîqaş û kombîyayîşan derbaz beno. Çîçekî vat: ''Netîceya kombîyayîş û nîqaşanê peyê weçînayîşan de ma dest pê prosesê konferansan kerd. Ma konferansan de kenê ke prosesê kongre rêxistin bikerê. Tay meseleyî hema zî dewam kenê. Prosesê kongre bêkêmasî nêbo zî ma eşkenê vajê ke îradeyê ma do bêro mojnayene û kêmasîyî do wedarîyê.''

Çîçekî îfade kerd ke têkoşîno komelkî teyna prosesê weçînayîşan de nêro kerdene la tay hêzê demokrat-şorişgêrî hema zî wina têgêrenê. Çîçekî vat: ''Seba ke têkoşîno komelkî prosesê weçînayîşan de yeno kerdene vera hêrişanê faşîzmî tedbîrê qîmî nênê girewtene. Wextêk de ke sîstem bi her hawayî hêrişê ma keno rayîrê xelisîyayîşî teyna sey 'performansê partîye yê serkewteyî' yeno dîyene. Na babete de HDKyî zî tay xeletîyî kerdî. La peynîya peynî de polîtîkaya şorişgêre do ser bikewa. Serkewtiş zî mîyanê ferasetê 'weçînayîş çîyêk o la her çi nîyo' de nimite yo.''