Wekîlê Partîya Çep a Keske yê Wanî Sînan Çîftyurekî bi wesîleya 1ê Êlule Roja Haştîye ya Dinya tecrîdê vera Rayberê Şarê Kurdî Abdullah Ocalanî û îşkenceyê zîndanan ANFyî rê ercna.

Çîftyurekî hêvî kerde ke na 1ê êlule haştîye bêra şarê Kurdîstanî. Çîftyurekî vist vîrî ke tepişteyo 70 serre Şakîr Turan zîndan de ameyo qetilkerdene û vat: ''Cenazayê ey bi saetan verê Amedî de ameye vindarnayene. Merdeyan rê zî îşkence yeno kerdene.''

Çîftyurekî bale ante ser ke Rayberê Şarê Kurdî Abdullah Ocalanî ra xeberêke nêna girewtene û vat: ''Îmrali de mîyanê tecrîdî de tecrîd yeno ferzkerdene. Goreyê huqûqî Abdullah Ocalan ganî bieşko keye û avûkatanê xo bivîno. Hukmat qanûnanê xo binpay keno. Ma venga hukmatî danê ke wa peynîya nê sîyasetî bîyaro. Birêz Abdullah Ocalanî ganî bieşko heqanê xo ra fayde bivîno. Birêz Ocalan tepişteyêko normal nîyo. O aktorêko sîyasî yo ke pêro dinya fikranê ey teqîb kena.

Ez şîya, Zîndanê Edîrne de mi Selahattîn Demîrtaş û Selçuk Mizrakli zîyaret kerdî. Înan zî vat ke ganî tecrîd wedarîyo. Seba ke sîyasetê şerî biqedo û rayîrê haştîye bêrê akerdene ganî Birêz Ocalanî de pêvînayîş bêro kerdene. Ganî Abdullah Ocalan bieşko fikranê xo rayaumûmîye de pare bikero. Heta ke tecrîd nêqedo çareserîye zî do nêra. Bi wesîleya Roja Haştîye ya Dinya ma venga hukmatî danê ke wa tecrîdî biqedîno.''