Komeleya Heqanê Merdiman (ÎHD) derheqê zextanê dewleta tirke yê remnayîş û ajanîye yê serra 2019î de raporêk eşkera kerd. Goreyê naye tewr tay 61 kesî seba ke ajanîye bikerê ameyî tehdîtkerdene.

Rapor de ame vatene ke derheqê zextanê bi tehdîtî îfadegirewtiş, mulakatkerdiş, remnayîş û ajankerdişî par 71 kesan muracatê înan kerd. Goreyê naye Merkezê ÎHDyî de 8 şûbeyanê  bînan de zî Îstanbul 36, Amed 8, Îzmîr 8, Anqara 5, Meletî 1 û Êlih  de 5 kesan muracat kerd. Înan ra 61 kesan vat ke  ê seba ke ajanîye bikerê ameyî tehdîtkerdene. 13ê înan ameyî remnayene û  5 înan zîndan de raştê tehdîtê ajanîye ameyî. Reyna cayanê cîya cîyayn de hemwelatijî ameyî tehdîtkerdene ke ajanîye bikerê.

Rapor de  ame waştene ke dozgerê komare vera nê qemîyayîşanê ajanîye yê ke yewî ra zafêr sûçî tede estê, bêveng nêmanê. Qerrekerdişê nê kesan ser o  ganî cipersayîşanê bitesîran bikerê û sûcdaran tesbît bikerê. Sûcdarî ganî binê pawitişê dewlete ra bêrê vetene û hukmkerdene. Reyna meclîs de zî derehqê babete de komîsyonêk bêro ronayene û derheqê  muracatan de ercnayîşan bikero.