Şubeyanê Komeleya Heqanê Merdiman (ÎHD) xeylê şaristanan de Wezîrîya Karanê Zereyî rê derheqê darbeya qeyûmî de mektubî şawitî û waşt ke wa na bêhuqûqîye ra apey abigêra.

Mektuban de dîya zanayene ke şaredarê ke bi îradeyê şarî ameyê weçînayene rixmo ke derheqê înan de bira dewayêke çin a erkî ra ameyê girewyene û qeyûmî herinda nînan de ameyê tayînkerdene. Mektuban de ame parekerdene ke nê kerdişî antîdemokratîkî yê û Wezîrîya Karanê Zereyî wa cade nê kerdişan ra apey abigêra.

Dêrsim de Şubeyê ÎHDyî verê PTTyî de, taxa Mogoltayî de eşkerayîyêke daye. Îdarekarê ESP û DEM Partî zî tewrê eşkerayîye bîyî. Tîya de Hemsereka ÎHDyî ya Dêrsimî Gonul Sonbahar tedeyîya mektube wende.

Adana de ÎHDyî îdarekaranê DEM Partî reyde mektube şawite.

Mersîn de Wekîla DEM Partî Perîhane Koca zî hetê ÎHDyî de mektube şawite.

Hatay û Anqara de zî ÎHDyî PTTyî ra mektubî şawitî û eşkerayîya xo daye.