Îdarekaranê Komeleya Haştîye ya 10ê Teşrîna Verêne ra û namzetê Anqara yê Partîya Çep a Keske Îhsan Seylanî ANFyî rê prosesê weçînayîşî ercna.

Seylanî da zanayene ke seba ke verê binpaykerdişê heqanê merdiman bigêro bîyo namzet û vat: ''Partîya Çep a Keske do biba vengê pêro şaran. Sîyaset bi xo parçeyêkê têkoşînî yo. Ez pê bawer a ke na xirabîya îqtîdarî 14ê gulane de do şora. 7ê hezîrane de zî no îqtîdar bin kewtbi la nêşibi. Herinda ney de îqtîdarî ma kiştî. Ganî prosesê mabênê 7ê hezîrane û teşrîna peyêne bêro cigêrayene. Serwezîrê ê çaxî Ahmet Davutoglu ganî qala ê prosesî bikero. 10ê teşrîna verêne de Anqara de 103 merdimî ameyî qetilkerdene. Ma do hesabê ê merdiman bipersê.''

Seylanî pare kerd ke o qezaya Tekmanî ya Erziromî ra yo û Qirkerdişê Anqara ra dima seba roşnîkerdişê qirkerdişî tay xebatî kerdî. Seylanî vat: ''Ma kurdan, elewîyan û bindestan ser o zaf xebatî kerdî, dokumenterî viraştî. Ma kerd ke bibê vengê nê merdiman. Ma bi serran o têkoşînê heqan kenê.''