Tepişte Nasrullah Kuran Rayberê Şarê Kurdî Abdullah Ocalanî reyde Zîndanê Îmraliyî de hendê  9 mengan mendbi û dima 26ê kanûna 2015î de surgunê zîndanê Sîlîvrî bînî amebi kerdene. Kuranî Yeni Ozgur Politika rê qala ê rojan kerde.

Nasrullah Kuranî wina xo da şinasnayene: ''Ez 1968 de dadîya xo ra bîya. Keyeyê mi sêrtij o la Serê Kanîye yê Riha de cabîyo. Mi wextê lîse de bire daye ke tewra têkoşînî biba. Ez û waya mi Leyla (Zekîye) tewrê gerîlayan bîyî. 14ê nîsana 1992yî de ez Alanyaya Antalya de esîr kewta. Mi rê cezaya muebede dîyaye. Ez xeylêk zîndanan de menda. Îmraliyî ra dima zî surgunê Sîlîvrî bîya.''

Kuranî da zanayene ke zîndanê Tirkîya de tepişteyî seke yenê 'rehabîlîtekerdene' la zîndananê Kurdîstanî de îşkence û teda yenê kerdene. Kuranî vat: ''1996 de serkêşîya Mehmet Agarî de zîndanê Tîpê Fyî bîyî rojdem. Dima ke Rayber Apo tepişîya, destpêkê 2000an de ma (tepişteyê kurdî) û çepgîrê tirkî hînî erşawîyayî zîndananê Tîpê Fyî. 2003 de koxûşê 40-50 kesî bîyî koxûşê 5-6 kesî. Dewlete hêverî şorişgêrê kurdî û tirkî cîya kerdî, dima zî embazê ma surgunê Fyî bîyî. Zîndananê Fyî de teda û zulmî giran bîyî.''

Kuranî wina qala rojanê xo yê Îmraliyî kerde: ''Rayber Apo kesêko serkêş o. Ey meseleyî tim pê terzêkê cîyayî çareser û analîze kerdêne. Her çîyê ey wayîrê yew sîstemî yo. Rayber Apoyî rê dîyalogî û fikirîyayîş seke nefesgirewtiş o. Coka vera ey sîstemê tecrîdî yeno caardene ke bênefes bimano. Rayber Apoyî zî vera ney tim wendêne û kerdêne ke mezgê xo zelal bikero. Wextêk ez bîya şahîdê ci ke Rayber Apoyî Sûrîye û Iraqî ser o analîzêk kerd û dewleta tirke no analîz vurna pratîkê xo. Dewleta tirke bi xo goş dayêne analîzanê ey ser. Seba ke fikrê Rayber Apoyî nêresê komelî no tecrîd hende giran yeno caardene.

26ê kanûna 2015î de şan ez û embaz Çetîn ma hucre de ronişte bîyî. Ber abi, di wezîfedarê zîndanî ameyî û înan vat ke ma sewqê yewna zîndanî bîyê. Înan waşt ke cade ma xo amade bikerê. Înan ma rê sebeb zî nêvat. Ma waşt ke Rayber Apoyî ra xatir biwazê. Gardîyanan ma berdî yew oda ke vatêne Rayber Apo uca de yo. Oda de verê dêsî de yew girseyê gardîyanan est bi û hetê vejîyayîşê oda de zî yew girseyê payeberzan est bi. Dewlete reyna muracatê zûran û komployî kerdbî. Ma pê wesayîtanê zirxînan ameyî berdene bi Sîlîvrî. 

Çira ma ameyî surgunkerdene ez nêzanena. Ma tim waşt ke cewabê ney bizanê. La surgunê ma ra hewteyêk verî Rayber Apoyî qewimîyayîşê ê rojan analîz kerdbî û vatbi 'Beno ke nê qewimîyayîşî tesîrê tîya zî bikerê, ganî ma hişyar bibê.' Ez vana qey wina bi; Prosesê çareserîye amebi qedînayene. AKP-MHP-Ergenekonî seba ke nê prosesî ra waştişê xo nêvistbi destî reyna dest eşt metodê tecrîdî. Ez nêzanena ke çira ez û embaz Çetîn hêverî erşawîyayê. La ez zanena ke îqtîdarê AKP-MHP-Ergenekonî bi konseptê 'welat de şerê vera kurdan, dinya de şerê vera kurdan' planî kerdêne.''