Îran de 21ê Sibate de weçînayîşê termînê 11. yê parlamento do bêro kerdene. Seba weçînayîşê Îranî û Rojhelatê Kurdîstanî de muracatê zaf kesan ameyî redkerdene. Ame parekerdene ke 290 reformîstan ra têna muracatê 230 kesî ameyî qebulkerdene.

Weçînayîş de 55 mîlyon kesî do raya xo bidê. Seba endamîye 14.000 kesan muracat kerd la Konseya Pawitişê Qanûnê Bingeyî endamîya zaf kesan red kerde. Ame vatene ke endamîya 6800 kesan ameye redkerdene û reformîstan da zanayene ke se ra 90ê nê muracatî muracatê endamanê înan bîyî.

Tewr zaf Rojhelat de muracatî ameyî redkerdene

Weçînayîş de kotaya 29 parlamenteranê Rojhelatê Kurdîstanî esta. Seba weçînayîşê 29 parlamenteran muracatê 354 namzetan ame qebulkerdene.

Sinê de seba 6 kursîyan 246 kesan muracat kerd û 14ê înan wextê muracatî de û 140 kesan zî cigêrayîşî ra dima muracatê înan ame redkerdene.

Kirmaşan de 281 kesan muracat kerd û namzetîya 189 kesan ameye redkerdene. Îlam de zî seba 3 kursîyan 131 kesan muracat kerd û muracatê 94 kesan ame redkerdene.

Ûrmîye de zî seba 12 kursîyan 531 kesan muracat kerd û muracatê 398 kesan ame redkerdene. Ûrmîye de muracatê kurdan qet nêame qebulkerdene û na zî polîtîkaya Îranî ya vera kurdan eşkera kena.

Meclîsê Çimdarîye yê Îranî îdîa kerd ke 9 hezar kesî asta muracatî de nîyê û 7 hezar namzetan zî îtîrazê bire kerd.

Îran de qanûnan ra partîyî nêeşkenê dekewê weçînayîşî têna paştdayîşê seba namzetan yeno eşkerakerdene. Heqê partîyan esto ke sey cephe debikewê weçînayîş.

Îran de 8 partî bîyî yew û sey cephe dekewenê weçînayîşî. Ame eşkerakerdene ke no cephe bi nameyê 'Koalîsyonê Îranî' dekeweno weçînayîşî. Koalîsyon de partîyê reformîstî estê.