Rêxistina HDPyî ya Îstanbulî meydanê Şîşhaneyî de waşt seba şermezarkerdişê dewaya qefilnayîşê HDPyî, tecrîdkerdişê Rayberê Şarê Kurdî Abdullah Ocalanî, hêrişê îşxalî û qirkerdişê Denîze Poyraz eşkerayîyêke bida la polîsan nêverda. Dima Hemvervatoxê HDKyî Cengîz Çîçek, Serekwekîlê Koma HDPyî Saruhan Oluç zî tede xeylêk kesî kom bîyî la polîsan bira qedexeyî bahane kerde û verê înan girewt.

Endamê TJA zî tede xeylêk wekîlê HDPyî Meydanê Galatasarayî de kom bîyî û ver bi meydanê Şîşhaneyî şîyî. Hemwelatîyan pê çepikan paştî daye girseyî. 

Nîqaşan ra dima polîsan vat ê do têna destûr bidê koma wekîlan. Girse pê sloganan ver bi bînaya HDPyî ya Tarlabşiyî şi la polîsan reyna verê girseyî girewt.

Hemsereka HDPyî ya Îstanbulî Elîfe Bulut tîya de eşkerayîye wende û vat: ''Ewro roja 212. ya grevê vêşanîye ya. Ma vera pêro neheqîyan, vera kişîyayîşê cinîyan, vera wedarnayîşê Peyman Îstanbulî, vera kişîyayîşê Denîze Poyraz tîya de yê.''

Hemvervatoxa HDKyî Esengule Demîr zî bale ante tecrîdê Îmraliyî ser û vat: ''Çaserîya meseleya kurdan seba şaranê Tirkîya tehlukeyîn nîya.''

Çalakîye ra dima wexto ke girse pê sloganan vila bîyêne polîsan pê gazê îsotî û fîşekanê plastîkan hêrişê ci kerd û kesêk destbend kerd.